Banderarik gabeko baina puntu garrantzitsuz jositako asteburua
Liga nagusietan ez da albiste onik heldu Oarso-Bidasora. Hondarribiko gizon eta emakumeak ez dira oso fin aritu.
Ez da asteburu onena izan Oarso-Bidasoko traineruentzat, baina okerrena ere ez. Ez da banderarik heldu gurera asteburu honetan, baina izan dira ospatzeko puntu eta postuak. Eusko Label zein Eusko Tren ligetan ez dira oso fin aritu gure ordezkariak. Zarautzen aritu dira emakume zein gizonezko nagusiak.
Eusko Label Ligako larunbateko estropadan igandekoan baino txukunago aritu ziren Hondarribia eta San Juan. Larunbatean hondarribiarrak seigarren izan ziren (20:26,18) eta San Juan zazpigarren (20:32,20). Igandekoan, berriz, Hondarribia zortzigarren izan zen (20:14,80) eta San Juan, bederatzigarren (20:30,18). Beraz, sailkapen orokorrean bosgarren postuan jarraitzen dute hondarribiarrek (113 punturekin) eta sanjuandarrak zazpigarren dira (72 punturekin).
Eusko Tren Ligan ere ez da albiste onik heldu. Zarautzen jokatutako larunbateko estropadan Hondarribia eta Hibaika okerrenak izan ziren, zazpigarren (11:04,32) eta zortzigarren (11:05,80) postua eskuratu zuten. Igandean Hibaikako emakumeak finago aritu ziren (10:48,72), baina seigarren postuarekin konformatu behar izan ziren. Hondarribiarrak igandeko estropadan azkenak izan ziren (10:58,14).
ETE ligan heldu dira albiste onenak. Aurreko asteetan hasitako bideari tinko jarraitzen diote batelerek. San Juan Koxtape bigarren izan da asteburu honetan (11:50:12 denborarekin) eta sailkapen orokorreko bigarren koskan jarraitzen dute sanjuandarrek, goiko postuari begira. Zarautz bi puntu eskaera dago.
KAE 1n San Pedro seigarren izan da (21:30:97) eta Hondarribia zortzigarren (21:53:56). Sailkapen orokorrean sanpedrotarrak bosgarren postuan daude (91 punturekin) eta Hondarribia hamargarren da (47 punturekin).
KAE 2 ligan ere izan da ospatzeko aukera, Hibaika oso fin aritu baita. Bigarren izan da (20:45,19), eta Orioko trainerutik oso gertu ibil dira errenteriarrak, zazpi segundo eskas geroago iritsi dira Hibaikakoak. Sailkapen orokorrean bigarren postuan jarraitzen du Hibaikak (59 punturekin). Orio, lehen postuan, 68 punturekin dago.
