"Oraindik erantzunik ez duten galderak sortzen dira"
Egoiliarrentzako bakarrik izango diren aparkalekuen proba pilotuaren harira, EAJ berriz jo du Abotsanitzen kontra. Informazioa "modu publiko eta irekian" emateko eskatu dio beste behin udal gobernuari.
Egoiliarrentzako bakarrik izango diren aparkalekuen proba pilotuak hautsak harrotu ditu azken egunotan. EAJk udal gobernuko buru Abotsanitz taldeari zenbait kontu leporatu dizkio azken aste honetan, eta hauen aurrean, Abotsanitzek ere zenbait kontu gezurtatu nahi izan ditu.
Gaur, hedabideei bidalitako ohar batean, jeltzaleek aipatu dute orain arte ez dela herritarrei “modu publiko eta irekian” jakinarazi jarri dituzten seinale horiek “zehazki zer inplikatzen duten”. Orain arte informazio hori onuradun izan diren bizilagunei bakarrik jakinarazi zaiela diote oposizioko taldekoek. Azken egunetan “informazio zuzenik ez duten beste herritar batzuen kontsultak” jaso dituztela aipatu dute, eta ez dutela “ziurtasunez erantzuten jakin”.
Horregatik diote oraindik “erantzunik ez duten galderak” sortzen direla. “Indarrean sartu al dira murrizketa horiek? Nor jotzen da egoiliartzat erregulazio honen ondorioetarako? Nola jokatu behar dute auzotarrek zalantzak badituzte eta salbuespenen bat badago?”, galdera horiek helarazi dizkiote udal gobernuari.
Gaur kaleratutako oharrean erantsi dute kontua ez dela polemika sortzea, “baizik eta herritar guztiek beren egunerokotasunean eragina duen neurri bati buruzko informazio egokia izatea bermatzea”. Horregatik, udal gobernuari eskatu diote “argi eta garbi azal dezala zer diren murrizketa horiek, zer aplikazio-epe dituzten eta zer kudeaketa behar diren, hala badagokio, dagozkion baimenak lortzeko”.
Eskaera horri lotuta, jeltzaleek proposatu dute Hondarribiko aparkalekuari buruzko “lan mahai espezifiko bat” martxan jartzea, “talde politiko guztiek parte hartu ahal izateko”. Taldekoek diote helburua ekarpenak eta proposamenak jasotzea dela, “herritarrek arlo horretan dituzten benetako beharrei erantzungo dieten irtenbide globalak eta adostuak eskaintzeko”.
Honako esaldiarekin bukatu dute oharra: “Informazio gardentasuna eta sentsibilitate politiko desberdinen arteko lankidetza dira gaizki ulertuak saihesteko eta gure kaleetan bizikidetza bermatzeko modurik onena”.
