Pikoketan fusilatutakoak omenduko ditu udalak astelehenean
1936an Pikoketan fusilatutako 20 pertsonei omenaldia antolatu die udalak Blaiako hilerrian. 1978ra arte ez zituzten gorpuak topatu.
1936an Beorlegi koronelaren tropa kolpistek fusilatutako hogei pertsonak oroitzeko omenaldia antolatu du Irungo Udalak. Astelehenean (hilak 11), 12:00etan, Blaiako hilerrian izango da, eta omenaldiarekin batera lore eskaintza eta biktima guztien omenezko minutu bateko isilunea egingo dute.
Izan ere, 89 urte dira 1936ko abuztuaren 11n “Irungo Gazte Komunisten garnizio txiki bat Pikoketa baserriaren inguruan zegoela” fusilatu zutenetik. Udalak azaldu duenez, “jakina zen kolpistek nekez hartzen zutela preso. Normalean, fusilatu egiten zituzten bertan, edo errenditu eta handik gutxira”. Pikoketako miliziano eta karabineroen kasuan ere horrela izan zen, “tropa kolpistek ustekabean harrapatu eta bertan fusilatu baitzituzten” Mertxe Lopez Cotarelo (16 urte), Pilar Valles Vicuña (18 urte), Jose Maria Arruti Idiakez (18 urte), Victor Genua Montiano (25 urte), Jesus Lopez Casado (26 urte), Agapito Dominguez Taguada (23 urte), Miguel Jacinto Lopez Pascual (49 urte), Vicente Argote (46 urte), Agustin Miguel Bermejo (39 urte), Felix Luz Etxeberria (27 urte) eta Angel Braña Lopez (27 urte). Gainera, Miguel Lorenzo Pascual (35 urte) eta eta Txato (25 urte) gehitu behar dira zerrendara, 2021ean eta 2022an identifikatuak izan zirenak, hurrenez hurren. Aurten grabatu dituzte bi izenak hilarrian.
Francoren diktaduran zehar “ez zen haien gorpuen berririk izan”. 1976an, ordea, Marcelo Usabiaga, Bernardo Usabiagaren anaia, gorpuen bila hasi zen; eta 1978an aurkitu zuten hobi komuna.
1978an bertan atera zituzten hobitik gorpuak, eta urte hartako abuztuaren 2an egin zitzaien lehenengoz Pikoketako fusilatuei omenaldia. Geroztik, urtero bi omenaldi egiten zaizkie, bata udan eta bestea udazkenean, hilerrian eta Pikoketan bertan.
