Erraldoi eta buruhandiek ireki dute Euskal Jiraren asteburua
Atsegiñaren buruhandi eta erraldoien desfilearekin ireki dute asteburu osoa iraungo duen Irungo Euskal Jira. Bihar izango dira gurdien desfilea eta herri bazkaria.
Egun handia biharkoa izango den arren, gaur eman diote irekiera asteburu osoa iraungo duen Euskal Jiraren egitarauari. 17:45erako prest ziren erraldoiak Irungo Urdanibia plazan, eta musikariak jotzen hasi bezain laster hasi dira desfilatzen, buruhandiak aurretik zituztela.
Atsegiñaren eskutik antolatu dute gaurko desfilea, eta jende andana gerturatu da bide bazterretara erraldoi eta buruhandiak ikustera. Egon da arreta guztia erraldoiengan jarri duenik, baina buruhandien ezusteko kolperen batekin azkar ohartu dira horiek ere bertan zaudela. Zenbait haur ere alde batetik bestera korrika ibili dira, buruhandiek harrapatuko ez zituztelakoan.
Desfilea abiatu denerako dena prest zegoen Urdanibia plazan festak eztanda egiteko: ondo jan eta edateko txosna muntatua, haurrentzako puzgarria puzten… Izan ere, behin erraldoi eta buruhandiek bukatuta, Matraka elektrotxaranga eta Eztanda erromeria arduratuko dira Irungo jai giroaz.
Bihar 11:00etan abiatuko da Euskal Jira Mendelutik, eta bertan izango da HITZA.
