Abotsanitzen gardentasun falta berretsi, eta aparkalekuen lan mahaia proposatu du EAJk
Udalak ez duela "komunikazio publiko" eta argia azpimarratu du EAJk. Halaber, gaur goizeko batzordean aparkalekuaren gaia lantzeko lan mahaia martxan jartzeko proposatu dute jeltzaleek.
Herriko zenbait kaleetan egoiliarrentzako bakarrik izango diren aparkaleku batzuk erreserbatzeko proba pilotua inor jakinean egon gabe abiatu izana salatu zuen atzo Hondarribiko EAJk. Haatik, Abotsanitzek EAJren bertsioa gezurtatu nahi izan du ekainaren 5eko Hiri eta Lurralde Antolamendu batzordean gaia aipatu zela eta bizilagunekin hiru bilera egin direla jada argituz.
EAJk onartzen du ekainaren 5eko batzordean aparkalekuei buruzko azterketaren emaitzak jaso zituztela esan zitzaiela, baina “laburki”. “Ez zitzaigun azterlan hori eman, eta ez zen ordura arte ikerketa horren berri eman”. Gainera, udal gobernuak azterketa emaitzak aurkeztu baino urtebete lehenago eskatu zuela jakin dute, hau da, 2024ko ekainean. Emaitzetan “egoiliarrentzako guneak prestatzea gomendatzen zen, batez ere udan”; baina, jeltzaleek diotenez, ez zioten gaiari sakonago heldu batzordean.
Abotsanitzek uztailaren 29an, uztailaren 30ean eta hilaren 4an bizilagunekin bilerak egin zituztela argitu duen arren, EAJren iritziz “ez da oso sinisgarria Abotsanitzek komunikazio publikoa eta gardena egin dela esatea”. Izan ere, egoiliarrentzako aparkalekuen jakinarazpena “onura zuzena jasotzen duten egoiliarrei bakarrik” egin zaie. Kontrara, alderdi jeltzaleak jakitera eman duenez ez zaie inguruko kaleetako bizilagunei inolako kontsultarik egin, “eta horiek ere eragina jasango dute”. Gainera, ez da Hondarribiko herritar guztiei bideratutako “komunikazio publikoko kanpainarik egin”, eta aparkalekuen azterketaren emaitzak ez dituzte mugikortasun mahaiarekin partekatu. “Hori ez da parte hartzea, ezta gardentasuna ere”.
Hori dela eta, gaur goizean egindako batzordean aparkalekuari buruzko lan mahai bat martxan jartzea proposatu du EAJk. “Aparkalekua da hondarribiarrak kezkatzen dituen gai nagusietako bat”, eta horretarako irtenbideak badituztela ziurtatu dute, eta “partekatzeko prest” daude.
