Urrian izango da Euskal Herriko Txotxongilolarien Topaketa
Urriaren 3, 4 eta 5erako antolatu dute bigarrenez Euskal Herriko Txotxongilolarien Topaketa, Hondarribia, Irun eta Hendaia artean. Abuztuaren 15era arte eman daiteke izena.
Iazko urrian antolatu zuten lehen aldiz Euskal Herriko Txotxongilolari Topaketa, “euskal txotxongilolariak elkartzeko xedea duen jaialdi autogestionatua”. Urtebete betetzear dela, bigarren edizioa aurkeztu dute, urriaren 3, 4 eta 5ean.
Bidasoko hiru herri zapalduko ditu topaketak: Hondarribia, Irun eta Hendaia. Gainera, berrikuntza batekin dator aurtengoa, txotxongilolariak elkartzeaz harago, “euskal txotxongilolari berriak eta sortze berrien lan erakustaldia antolatzea izango baitu helburu”.
Topaketara aurkezteko bi aukera dituzte hautagaiek. Batetik, topaketara joatea “beste artistekin elkarbanatzeko”. Lehen talde honetan izena eman eta hautatuak direnei ostatua eta janaria bermatuko zaie. Bestetik, topaketara joatea lan erakustaldi bat egitera edo kabareteko partaide izatea. Bigarren taldekoei ere ostatua eta janaria proposatuko zaizkie; baina, horrez gain, lan erakustaldia egiten dutenek 800 euroko (BEZa barne) saria jasoko dute; kabaretean pieza motz bat egiten dutenek, ordea, 150 eurokoa (BEZa barne).
Abuztuaren 15era arte zabaldu dute izen emateko epea. Haatik, hautagaiek zenbait baldintza bete behar dituzte:
- Kabareterako piezak 8 eta 13 minutu artekoak izango dira.
- Euskara hutseko lanek lehentasuna izango dute.
- Teknikoki autonomoak diren taldeek lehentasuna izango dute.
Horrez gain, lan erakustaldi zein kabaretera aurkeztu daitekeela zehaztu dute. Urriaren 4ean izango da kabareta, 22:00etan.
