Dozenaka hondarribiar atera dira kalera euskararen kontrako epaiak salatzera
Vox alderdiaren eskariz Espainiako Auzitegi Gorenak euskararen kontra egindako ebazpena arbuiatu dute gaur hondarribiarrek.
Udalerri Euskaldunen Mankomunitateko (UEMA) beste 117 udalerrietan bezala, Hondarribian azken egunetan Espainiako Auzitegi Gorenak euskararen kontra emandako epaia salatu dute. Dozenaka herritar izan dira udaletxearen parean bildu direnak euskararentzat justizia, lege babesa eta arnasa eskatzera bildu direnak.
Hondarribian, udalean ordezkaritza duten hiru alderdi politikok egin zuten gaurko bilkurarako deialdia, Abotsanitzen, EAJren eta EH Bilduren udal taldeek hain zuzen.
VOX alderdi espainiarraren eskariz, Euskal Autonomia Erkidegoko (EAE) euskararen arloko udal legearen dekretutik baliogabetutako artikulu gehienak atzera bota ditu Espainiako Auzitegi Gorenak, eta, euskara lehenetsiz gero, hizkuntzen koofizialtasuna urratzen dela ebatzi du sententzian. “Udalerri euskaldunentzat mugarria izan zen EAEko udal legea, elebitasun simetrikoa gainditzeko eta euskara lehenesteko aukera eman zuelako. Ezagutu berri dugun epaiak, ordea, udal legea kimatu eta ebatzi du ezin dela neurririk hartu hizkuntza koofizialetako bat gailentzeko, horrek berak urratu egingo lukeelako koofizialtasuna”, esan du UEMAk.
