'Justizia, lege babesa eta arnasa euskararentzat', bihar 11:00etan Hondarribian
Hondarribia UEMAko kide den heinean, azken egunetan Espainiako auzitegiek euskararen kontra hartutako erabakiak salatzeko elkarretaratzea egingo dute bihar (larunbata) udaletxearen parean.
11:00etan, udaletxearen aurrean egingo dute biharko elkarretaratzea. VOX alderdi espainiarraren eskariz, Euskal Autonomia Erkidegoko (EAE) euskararen arloko udal legearen dekretutik baliogabetutako artikulu gehienak atzera bota ditu Espainiako Auzitegi Gorenak, eta, euskara lehenetsiz gero, hizkuntzen koofizialtasuna urratzen dela ebatzi dute sententzian. “Udalerri euskaldunentzat mugarria izan zen EAEko udal legea, elebitasun simetrikoa gainditzeko eta euskara lehenesteko aukera eman zuelako. Ezagutu berri dugun epaiak, ordea, udal legea kimatu eta ebatzi du ezin dela neurririk hartu hizkuntza koofizialetako bat gailentzeko, horrek berak urratu egingo lukeelako koofizialtasuna”, esan du Udalerro Euskaldunen Mankomunitateak (UEMA). Erabaki horren kontra egiteko bihar (larunbata) eguerdirako elkarretaratzeak deitu ditu UEMAk bertako kide diren udalerrietan; Hondarribikoa 11:00etan izango da, udaletxearen aurrean.
Juztizia, lege babesa eta arnasa euskararentzat lelopean egingo dituzte elkarretaratzeak. Hondarribian, udalean ordezkaritza duten alderdi politikoen aldetik, Abotsanitzen, EAJren eta EH Bilduren babesa du mobilizazioak. Bertara ager daitezela eskatu diete herritarrei.
