Aurreikusitakoa baino jende gehiago erakarri du 'Dies Oiassonis' jaialdiak
Hilaren 9tik 13ra bitartean 50 jardueratik gora antolatu dira Irunen, Oiasso garaira itzuliz. Espero zena baino parte hartzaile gehiago bildu dira, guztira 7.500 lagunek parte hartu dutelarik jardueraren batean edo bestean.
Arrakastatsua izan da aurtengo Dies Oiassonis jaialdiaren edizioa. Publiko zabalarentzako 50 jardueratik gora antolatu ostean, 7.500 pertsona hurbildu dira jardueraren batera edo bestera.
Cristina Laborda alkatea eta Nuria Alzaga Udaleko Kulturako ordezkariarekin batera izan da Juanjo Jimenez Oiasso Museoko zuzendaria jaialdiaren bilana egiten. “Oso balorazio ona” egin dute, izan ere, aurreikusitakoa baino parte hartzaile gehiago hurbildu dira, beraz, “arrakasta handiagoa izan du herritarren erantzun bikainari esker”.
Ekitaldi ugari gainezka egon dira, toki guztiak bete dira errepikapen bakoitzean. Horren erakusle izan da zirku erromatarra, hiru ikuskizun egin, eta bakoitzean 600 ikusle elkartu baitira. Navigium Isidis prozesioak ere harrera ona izan du, inoiz baino parte hartzaile batu baititu; 192 lagun, hain zuzen ere. Gainera, Udalaren eta Oiasso Museoaren kalkuluen arabera, 1.600 pertsona inguru erakarri ditu.
Gainerako emanaldiek ere arrakasta izan dute. Ifigenia antzezlanera 250 ikusle hurbildu ziren; Oiassonensis XVII antzerkira, 200 inguru; Percy Jackson y el ladrón del rayo filmaren proiekziora, ordea, 230. Gainera, Oiasso Museoak izandako bisita kopurua azpimarratu dute antolatzaileek. Jaialdi egunetan doakoa izan da sarrera, eta 1.263 pertsona hurbildu dira bisita egitera. Terma erromatarren bisita gidatu berezia ere bete egin zen.
Jatekoak ere izan zuen tokia jaialdian. Isicia Omentata plateraren lehiaketa Donostiako Maun jatetxeak irabazi zuen. Gainera, pintxo erromatarren ibilbideak Irungo hamasei ostatuk lagundu zuten. Hala ere, eguraldiak ez zuen utzi Convivium afaria lasaitasunez bukatzen, eta 137 lagun udaletxeko arkupeetara joan behar izan ziren babestera.
Ikasteko aukera ere izan zen, Legio V Oiasso – Irun elkarteak larrugintza eta zeramika tailerra antolatu baitzituen. Bien artean 430 parte hartzaile izan ziren.
Aurten, berrikuntza gisa, jaialdiak ostalaritzan eta merkataritzan duen eragin ekonomikoa aztertuko dute. Alzagaren ustez, parte hartzea handiagoa izateak eragin ekonomiko handiagoa ondorioztatuko du.
Hala, Udalak jaialdia aurrera eramateko ekarpena egin duten guztiei eskerrak eman nahi izan dizkie: “entitateei, elkarteei, ostalariei, Museoko langileei, boluntarioei, eta udal zerbitzuetako langileei”.
