Dies Oiassonisen inpaktu ekonomikoa aztertuko du udalak
Inpaktu ekonomiko zuzena eta zeharkakoa da ikertuko dutena. Udara amaitu aurretik txostena burututa egongo da.
Atzo hasi zen Dies Oiassonis jaialdi erromatarra eta Irungo Udalak azterketa espezifiko baten enkargua egin du jaialdi honen inpaktu ekonomikoa zenbatekoa den neurtzeko. Kualifikatu nahi dutena da Irungo merkataritza, ostalaritza eta turismoari zenbateko ekarpena egiten dion.
Udalak urtero antolatzen dituen ekitaldietako bi ebaluatzeko kontratu bat daukat eta horren barruan egingo du azterketa ikertalde aholkularitza talde espezializatu batek. Lehen fasean, jaialdi erromatarrean jarriko dute arreta, atzotik hilaren 13ra alegia.
Hiru ardatz ezarri dituzte. Lehenbizikoan jaialdiaren helburuak, antolamendua, jarduerak eta bilakaera historikoa aztertuko dituzte. Bigarrengoan inpaktu ekonomikoa eta itzulkina kalkulatuko dituzte, zuzeneko eta zeharkako gastuak. Azkenik, jaialdiaren inpaktu soziala ikertuko dute, parte hartzaileen gogobetetze maila eta esperientzia neurtuz. Ekitaldiak identitate kolektiboari eta hiriaren proiekzio turistikoari egiten dion ekarpena ere begiratuko dute.
Inkesta presentzial bidez jasoko dituzte, parte hartzaileen kopuruei buruzko datuak eskatu, antolatzaileak elkarrizketatu eta datu ekonomiko eta turistikoak baliatuko dituzte. Metodologia kontrastatua izango dela ere aurreratu dute eta KPI, sorrarazitako lanpostuak eta itzulkin publikoa neurtuko dituzte horrela.
Ikerketa lanaren txostena hurrengo urteko jaialdia hobeto planifikatzeko baliatuko dutela azaldu du udalak. Halaber, Irungo motor ekonomiko eta kultural gisa Dies Oiassonisen betekizuna sendotzeko erabiliko dute. Udara amaitu aurretik txostena bukatuta egongo dela esan dute.
