Jaiak "normaltasun eta harmonian" igaro dira EAJren arabera
Sanpedro eta sanmartzialak bukatu eta egun gutxira, jaien balorazioa egin du alderdi jeltzaleak. Zerbitzu publikoetako langileen eta egitarauan parte hartu duten bolondresen lanaren garrantzia azpimarratu du.
Sanpedro eta sanmartzialetatik egun gutxira, jaien balantzea egin du EAJk. Balorazio baikorra egiten dute, jaiak “ia normaltasun eta harmonia osoz” igaro baitira; eta horregatik, “Irun jaien, bizikidetzaren, aniztasunaren, errespetuaren eta umore onaren eklosioa izan dela” deritzote.
Eskerrak eman nahi izan dizkiete irundar guztiei, zer esanik ez egitaraua aurrera eramaten duten tokiko eragileei, “lan boluntario eta desinteresatutik abiatuta hainbat jarduera antolatu eta sustatu baitituzte”. Eragileek jai garaian egiten duten lanaz harago, urte osoan zehar duten inplikazioa balioan jarri dute jeltzaleek.
Udaleko zerbitzu publikoetako langileen lanari ere aitortza egin diete, “isilean eta oharkabean” egiten den lana izan arren, “funtsezkoa baita jaiegunak normaltasunez igarotzeko”. Arlo askotako langileek bermatu dute jaiak “ahalik eta ondoen igarotzea”: segurtasun, garbiketa, azpiegiturak, osasun arreta edo garraiokoek…
Azkenik, herriko merkatari eta ostalariak ere eskertu dituzte, “beste urte batez lagundu baitute hiri osoa apaindu eta gozarazten”.
San Pedro eta San Martzial egunak “lasai eta elkarrekin” ospatu ahal izan zirela azpimarratu du EAJk. “Erakundeetako arduradun diren aldetik”, jaietan errespetu eta bizikidetza jarrera nagusitzeko konpromisoa hartu dute, “eta herritarrek horri erantzuten jakin dute”.
