Hilekoari buruzko zenbait jarduera Emakumeen Etxean
Hilaren 28an Hilekoaren Higienearen Nazioarteko Eguna dela eta, eguna ezagutarazteko tailer eta dokumental proiekzioak antolatu dituzte hilaren 28tik 30era.
Hilaren 28an da Hilekoaren Higienearen Nazioarteko Eguna, eta Udaleko Berdintasun arloak eguna denei ezagutarazteko baliatu nahi izan du. Hala, tailer bat emango dute hilaren 28 eta 29an, eta dokumental bat proiektatuko 30ean.
Ezagutu zure hilekoa izena du tailerrak, eta Maria Garabieta ugalkortasun naturalean espezializatutako emaginak emango du. Asteazkenean, hilaren 28an, gazteleraz izango da; ostegunean, 29an, aldiz, euskaraz, 17:00etatik 19:30era. Toki mugatuak egongo dira, beraz, Udalaren webgunearen bidez edo Irungo Emakumeen Etxean eman behar da izena.
Ostiralean, hilaren 30ean, Gorriak dokumentala proiektatuko dute, 18:30etik aurrera. Munduko hainbat tokitan “emakumeek hilekoarekin duten esperientzia intimoa jasotzen du” filmak, India, Hego Korea eta Euskal Herrian, hain zuzen ere. Kultura eta belaunaldi bakoitzak ezberdintasunak dituela erakutsi arren, “hilekoak mugak gainditu eta emakumeak giza mailan lotzen dituela” azpimarratzen da. Dokumentala bukatzerakoan, mahai ingurua egongo da Iraia Arburua zuzendariarekin.
Jarduera guztiak Irungo Emakumeen Etxean izango dira.
