Uda bukaeran hasiko dira eraikitzen Arbesko egoitza
Azterketa geoteknikoak egin ondoren, "modulu kontrolatuko zutabeetan bermatutako hormigoizko lauzen zimendu sistema" erabiltzeko hautua egin du Gipuzkoako Foru Aldundiak. Joan den astean Aldundiak eta Udalak udal taldeetako bozeramaileekin eta auzoko ordezkariekin bilera egin zuten proiektuaren berri emateko.
Arbes auzoko gizarte zerbitzuen egoitza berria uda bukaeran eraikitzen hasteko asmoa du Gipuzkoako Foru Aldundiak. Lursailaren azterketa geoteknikoa egin eta “modulu kontrolatuko zutabeetan bermatutako hormigoizko lauzen zimendu sistema” erabiltzea dela egokiena ondorioztatu dute. Eraikuntza lanek 28 hilabete irautea aurreikusten dute, eta 34.898.547 eurokoa da aurrekontua.
Eraikitzen hasi aurretik egin beharreko hainbat lan egin dituzte dagoeneko, besteak beste, “lurzatia zeharkatzen zuen linea elektrikoa kendu, lursailaren baldintza hidrogeologikoei buruzko azterketa lanak egin edo inguruko eraikinetako notario aktak hartu”. Udala hasi da jada “obra lizentzia eman ondorengo lanekin”, egoitza berria “ahalik eta epe laburrenean” eskuragarri egoteko asmoa baitu.
Gizarte zerbitzuen egoitzak sei bizikidetza unitatez osatutako 130 adineko pertsona jasotzeko aukera emango du. Desgaitasuna duten pertsonentzat, ordea, 26 toki egongo dira bi unitatetan banatuta. Eguneko bi zentro ere izango ditu egoitzak: 30 toki adinekoentzat eta 25 desgaitasuna duten pertsonentzat. Mendekotasunik ez duten 50 adinekoentzako tutoretzapeko 48 apartamendu ere egongo dira.
Zaintza sistema indartzen
Proiektuaren aurrerapenen berri emateko bilerak egin zituzten Maite Peña Zainketa eta Gizarte Politiketako diputatu eta Cristina Laborda Irungo alkateak aurreko astelehenean, hilaren 12an. Lehen bilera goizean egin zuten, Irungo udal taldeetako bozeramaileekin; bigarrena, ordea, arratsaldean egin zuten, Arbesko Irungo Herritarren Foroko eta Adinekoen Kontseiluko bizilagun eta ordezkariekin.
Horrelako bileren eta “herritarren parte hartzearen” garrantzia azpimarratu du Peñak, “funtsezkoak baitira gure bizilagunen beharrei benetan erantzungo dien zaintza sistema bat eraikitzeko”. Proiektua “eskubide zientifikoetan, pertsonalizazioan, prebentzioan eta parte hartze komunitarioan oinarritzen da”.
Aldundiak Gipuzkoa osoan ekin dion zaintza sistemaren eraldaketa prozesuaren baitan sartzen da Arbesko proiektua. Zainketa eta Gizarte Politiken 20>30 Agenda jarraituz “zaintza sistemaren eraldaketa sakona” abiatu du Aldundiak, helburua “beharrei aurre hartzea, laguntzak mantentzea eta lurralde eragile guztiekiko lankidetza sendotzea” izanik. Laborda alkateak ere proiektu honen balioa nabarmendu du, “premiazko behar sozial bati erantzuteaz” harago, “defendatzen dugun hiri eredua indartzen baitu, pertsonen zaintzan oinarritua dagoena”. Proiektua erreferente izatea bilatzen dute.
