Aski Da! kolektiboak ekarpenak egingo dizkio Euskara Planari
Plana idatzita dauka jada Euskara departamentuak, baina partaidetza prozesu baten bidez ekarpenak egiteko erabakia hartu du kolektiboak. Udalaren proposamen hau "baikorki" baloratu dute.
Aski Da! Irunen bizi nahi dugu kolektiboak lehen bilera eduki zuen Irungo Udaleko Euskara departamentuarekin pasa den otsailaren 12an eta hainbat konpromiso adostu zituztela azaldu dute. Horrez gain, Euskara Aholku Batzordeetan parte hartu dute eta horietan Euskara Plan Estrategiko berria parte hartzearen bidez lantzeko proposamena egin diote udalari.
Proposamen hau Irungo Udalaren partetik “historikoki” euskarari egin dion trataera eta begirune faltagatik luzatu diotela adierazi du Aski Da!-k eta helburu nagusitzat jo dute irundarren hizkuntza eskubideak bermatzea eta euskararen erabilera Irunen suspertzea.
Azken hilabetetan ibili dira Aski Da! kolektiboko kideak euskararekiko kezkak adierazten eta nahiak bideratzeko eskatzen eta tarte horretan Irungo Udaleko Euskara ordezkaria aldatu egin da, EAJ eta PSE-EEren arteko gobernu akordioaren ondorioz. Bada, Josu Igiñiz jeltzalea da oraingo Euskara zinegotzia eta kolektiboak “baikorki” baloratu du haren “prestutasuna” eta “konpromisoa” kolektiboaren kezkei eta nahiei dagokienez.
Dena den, kolektiboak exijitu du euskararen normalizazioari lotutako udal ordenantza bete dezatela. “Oraindik ere hutsune handiak daude udal administrazioan eta kezkaturik gaude, arau hauste ugari identifikatu ditugulako 2025 honetan bertan, udalak bere eguneroko jardunean irundarron hizkuntza eskubideak bermatzen ez dituelako”, adierazi dute.
AROA Euskara Plana
Otsailaren 12an euskal hiztunen eskubideen aldeko kolektiboa lehen aldiz elkartu zen Irungo Udalarekin eta ordurako 2025-2029 AROA Euskara Plan berria deiturikoa idatzita zeukala deitoratu du Aski Da!-k. Dokumentu hau, baina, udalbatzatik pasa behar da eta zinegotzien gehiengoak alde bozkatu behar du onartua izan dadin, eta hargatik, Igiñiz ordezkariak partaidetza prozesu bat jarri du martxan dokumentu hau hobetzeko ekarpenak egin ahal izateko.
Irungo kolektiboak parte hartuko duela azaldu du, udalak hizkuntza politikaren garapenean inoiz egin ez duen urratsa dela ulertuta. Dena den, nabarmendu nahi izan dute udalak mahai gainean jarritako euskara plan berriak ez dituela kolektiboak hasieran egindako eskaerak asetzen.
Haien ekarpenak aintzat hartzeko zirrikitua ireki bada ere, “Euskara Plan berria ez da inolaz ere prozesu parte hartzaile baten emaitza izango”, azaldu dute. “Funtsean, gurea egiten ez dugun diagnostiko batetan oinarrituta, egina aurkezten zaigun plan baten gainean aldaketak edo hobekuntzak era mugatuan egiteko aukera besterik ez dugulako”, gaineratu dute.
Hala ere, euskararen erabilera hobetzeko eta euskal hiztunen eskubideak bermatzeko “ahalegin guztiak gutxi direla jabetuta” dago kolektiboa eta, hargatik, eraikigarriak diren prozesuetan elkarlanean aritzeko borondate osoa erakutsi dute. Alabaina, Aski Da!-ko kideak boluntarioak dira eta udal administrazioaren egutegiaren “malgutasun falta” salatu dute parte hartu ahal izateko.”Estu eta larri ibiliko gara abagune honek merezi duen eta nahi genukeen bezala parte hartu ahal izateko”, zehaztu dute.
Parte hartze prozesua gaur hasiko da (hilak 12) eta hurrengo saioak hilaren 19an, 26an eta ekainaren 9an izango dira. Kolektiboak aurreratu du parte hartze prozesuaren emaitza hura bukatzean baloratuko duela, eta inolaz ere ez lehenago.
Txalotu egin dute udalak aitortu izana euskararen egoera zuzentzeko “ezinbestekoa” dela elkarlana eta 2029ra luzatuko den plana bada ere idatzi dutena, aurrerantzean ere planaren garapena eta etorkizuneko plangintza berrien lanketarako Euskara Mahai eta Jarraipen Batzordeak deitzeko beharra dagoela adierazi diote udalari.
