Minbizia dutenentzako kozinatzen ikasi dute Plaiaundin
Elikadura eta sukaldaritza tailerra antolatu dute Plaiaundi LHIIn, 'ONkologia 360º' proiektuaren baitan. Minbizia duten paziente, haien senide, eta dietetikako ikasleek parte hartu dute.
Prestakuntzarako edukia eta sukaldaritza praktikoa uztartuz, minbizia duten pertsonentzako elikadura eta sukaldaritza tailerra egin zuten atzo, hilaren 8an, Plaiaundi LHIIn.
Prestakuntza edukia Garbiñe Aizpuruak, Donostialdeko ESIko nutrizionistak, aurkeztu du. Tratamendu onkologikoan dauden pertsonen elikadura egokitzeko zenbait aholku eman ditu, baita horren eredu bat aurkeztu ere: Harvardeko plater osasungarria. Otordu guztietan “fruta eta barazkiak, zerealak eta elikagai proteikoak proportzio orekatuetan txertatzea” proposatzen du, “mokadu bakoitzak ahalik eta elikadura-dentsitate handiena eman behar duela” kontuan hartuz.
Sukaldaritza erakustaldi praktikoarekin jarraitu du saioak. Cebanc Ostalaritza eta Sukaldaritza Eskolako hiru sukaldariek disfagia duten pertsonek ere jan dezaketen bolognar erara prestatutako pasta testurizatua eta sagar konpotaz egindako flana kozinatu dituzte.
Osakidetza eta Cebanc eskolaren laguntzarekin, Plaiaundi LHII, Monte Albertia LHII, Inmakulada Lanbide Ikastola eta ESCIVI ikastetxeen artean antolatutako ekimena izan da, ONkologia 360º proiektuaren baitan. Aitor Gaztelumendi dietetikako irakasle eta proiektuaren ikertzaileak azaldu duenez, “minbizia duten pertsonen bizi-kalitatea diziplina anitzeko ikuspegi batetik hobetzea helburu du” proiektu honek, “Lanbide Heziketako hainbat ziklo aplikatuz”.
“Giro hurbila eta parte-hartzailea izan dela, eta onkologian elikaduraren garrantziari buruzko hausnarketa bultzatu duela” azpimarratu dute antolatzaileek.
