Gorputz perfektuaren beharrari buruz arituko dira hilaren 13an
'Presio estetikoaren eragina osasun fisiko eta mentalean' hitzaldi zikloko hirugarren hitzordua izango da hilaren 13koa. Argaltasunaren atzean dauden interes ekonomikoak izango dituzte hizpide.
“Gorputz perfektua, osasuna ala negozioa?”. Galdera honi erantzuteko argaltasunak dituen interes ekonomikoak kontuan hartu behar dira: “negozio biribila da”. Izan ere, “etengabe gure gorputzarekin gaizki sentiarazten gaituzte”, eta edertasun eredua ere behin eta berriz aldatzen denez, “etengabe sortuko digute gure gorputza aldatzeko beharra”.
Honi buruz aritzeko antolatu dute Elikaeskola eta Parean elkarteak Gorputz perfektua, osasuna ala negozioa? Presio estetikoaren eragina hitzaldia. Martxoan hasi eta ekainean bukatuko den Presio estetikoaren eragina osasun fisiko eta mentalean hitzaldi zikloaren baitan antolatu dute. Hilabete hauetan bigarren asteartero antolatzen dituzte hitzaldiak.
Hilaren 13an, asteartean, Palmera Monteroko bigarren aretoan da hitzordua, 18:30ean. Asteartekoaren ondoren, ekainaren 10ean itxiko dute hitzaldi zikloa, Dietak, pisu ideala… Zer da elikadura osasuntsua? hitzaldiarekin.
