Durangarren aurka galdu eta denboraldia bukatu du Biok Txingudik
Durango Ermarmotorren aurka porrot egin zuen Biok Txingudik asteburuan. Hala ere, Euskadiko lehenengo mailara sailkatu eta Gipuzkoako bigarren talde bilakatzea lortu dute.
Larunbatean, hilaren 3an, jokatu zuen Biok Txingudik Euskal Ligako final laurdena, Durango Ermarmotorren aurka. Lucia Duran, Alazne Macicior, Maddalen Alberdi, Zumendi Caro, Lupe Pescador, Lohitzun Aia, Lur Gaston, Lea Etxebarrieta, Leire Muñoz, Paola Vega, Irati Beraiz, Uxune Aranburu, Miren Fernandez, Laida Rodriguez eta Jessica Gomezek osatu zuten hamabostekoa, eta Alfredo Miranda izan zen epaile.
Durangarrak ohituta daude “defentsa lerroa abiaduraz haustera”, beraz, lehen hogei minutuetan lau entsegu eraldatu egin eta 28 puntu eskuratu zituzten. Biok Txingudikek melearekin erantzun eta bost puntu eskuratu zituen. Atseden aurretik, Txingudiren defentsa birritan zulatu eta 42 eta 5eko puntuazioarekin bukatu zuten lehen zatia.
Atseden ostean, bi entsegu eta eraldaketa bat egin zituen Durango Ermarmotorrek 46. eta 56. minutuetan, 54 eta 5 geldituz. Txingudiarrek aldea murriztea lortu zuten, entsegu eta eraldaketa banari esker, markagailua 54 eta 12ra geldituz. Partida bukatzeko, durangarrek hiru entsegu eraldatu egin eta 72 eta 12ko aldea lortu zuten.
Porrot honekin bukatu da Biok Txingudiren ikasturtea. Hala ere, denboraldi txukuna egin dute, eta “sentsazioak oso onak izan dira, aurreikuspen baikorrenetan ere play-offertara sailkatzea erronka zaila baitzen”. Gipuzkoako txapelketako bigarren talde gisa gelditu dira.
Gazteek garaipen eta porrot bana
18 urtez azpikoen Gabiria Txingudi/Bera Bera/Baztan taldeak 50 eta 21 galdu zuen asteburuan, Gernikaren aurka. 16 urtez azpikoek, ordea, 35 eta 26 irabazi zuten Zarautz/Beltzaken aurka.
Asteburu honetan bi hitzordu ditu Txingudiko errugbiak: bihar 16 urtez azpiko Txingudi/Baztan taldeak Lekarozen jokatuko du La Unicaren aurka, 11:00etan; igandean, ordea, Eskolaren txanda izango da, 10 eta 12 urtez azpikoen taldeek Gipuzkoa osoko taldeen aurka jokatuko dute Kontxako topaketan.
