Eman daiteke izena Mugaldeko Udaleku ibiltarietan
Urruñan hasi eta Sara, Igantzi eta Lesakatik pasako dira; Oiartzunen amaituko da bidea. Izena apirilaren 6a baino lehen eman behar da.
Iazko edizioko irudi bat. Ttur-ttur Euskaltzaleon Bilguneak antolatuta eta Bortzirietako Euskara Mankomunitateak, Oiartzungo Udalak eta Sarako zein Urruñako Herri Etxeek babestuta, bigarrenez antolatu dituzte Mugaldeko Udaleku ibiltariak.
2010-2011 urteetan jaiotako gazteei zuzendutako eskaintza da, eta euskarazko aisialdia sustatzea eta Iparraldeko zein Hegoaldeko gazteen arteko loturak sendotzea da helburua.
Urruñan hasiko dute ibilbidea, eta Sara, Igantzi eta Lesaka pasa ondoren, Oiartzunen emango diote bideari amaiera. Herri bakoitzean zenbait jarduera antolatuko dituzte, betiere euskal kultura, natura eta kirola uztartuz. Era berean, antolatzaileek azpimarratu dute parte hartzaileek euskaraz aritzeko eta euskalkiak ezagutu eta praktikatzeko aukera izango dutela.
40 gazterentzat dago lekua esperientzia honetan, eta familiek apirilean jakingo dute izen ematea onartu zaien edo ez. 150 euro balio dute udalekuek, eta Bortzirietan, Oiartzunen, Saran edo Urruñan erroldatutako haurrek izango dute lehentasuna.
Izena apirilaren 6a baino lehen eman behar da, hemen.
