Badiako mugikortasunaz arituko dira eskualdeko gazteak
Adi Bidasoa jardunaldia antolatu du Bidasoa bizirikek eta eskualdeko gazteak elkartuko dira mugikortasunaz hitz egiteko. Hilaren 22an izango da, Irun Factoryn.
Adi Bidasoa jardunaldiaren bigarren edizioa antolatu dute Irun, Hondarribia eta Hendaiako Udalek, Bidasoa-Txingudi Mugaz Gaindiko Partzuergoaren bidez. Hilaren 22an egingo da (larunbata) Irun Factoryn eta ardatz nagusia Txingudi badiako mugikortasuna izango da. Zehazki, 16 eta 30 urte bitarteko gazteei begirakoa da eta 11:00etatik 13:00etara egongo dira bilduta.
Eskualdeko gazteak elkartuko dituzte oraingoan eta ideiak trukatzen arituko dira, mugikortasunaren bueltan. Halaber, Gazteria sailei ekimenak eta jarduerak proposatzeko aukera izango dute parte hartzaileek.Jasotako ekarpenak SEM’25 proiekturako edota beste topaketa tematiko batzuetarako ekimenak sortuzko dituzte.
Honako galdera hauek planteatuko dizkiete: zein garraiobide erabiltzen dira mugaz gaindiko mugikortasunerako?; eta zein ohitura edo jarduerak sustatzen edo oztopatzen dute mugikortasuna? (aisialdia, kirola, lagunak, hezkuntza, lana, osasuna, turismoa, hizkuntza-aniztasuna…).
Eztabaida eta dinamika sustatu nahi dituzte eta hori bultzatzeko Europako Batasuneko Europe Direct bulegoko Junkal Cuadrado Jorge arituko da. Cuadradok Erasmus+ programan hartu zuen parte eta bere esperientzia partekatzeko ere probestuko du parte hartzea. Ez da bakarrik egongo eta harekin batera Gipuzkoako Garraioaren Lurralde Agintaritza egongo da, bere mugikortasun proiektuak eta mugikortasuneko joerak aurkezteko.
Parte hartu ahal izateko izena eman behar da Whatsapp mezu bat bidalita +34 679 202 899 telefonora edota mezu bat bidalita helbide elektronikoz.
