Etiopiara bidaiatuko du Irunek ostegunean
Zure abenturaren bila programaren baitan Etiopiako bidaia aurkeztuko du Mariela Sanchezek Irunen. Bidaiatzeko zaletasuna azaltzeko programa da Zure abenturaren bila.
Irungo Udaleko Kultura arloak Zure abenturaren bila programaren baitako ETIOPIA : gure jatorrietara bidaia liluragarria (ETIOPÍA: un fascinante viaje a nuestros orígenes) saioa antolatu du. Programa honen hirugarren saioa da, eta oraingoan Mariela Sanchezek aurkeztuko du bere bidaia.
60 bat minutuko ikus-entzunezkoa proiektatuko du, eta ondotik, Mariela Sanchezekin solasaldirako aukera egongo da. Saioa gazteleraz izango da.
Hitzaldian Etiopiako txoko ezberdinak ezagutzeko aukera egongo da, Adis Abeba hiriburutik hasita, Lalibelako harkaitzetatik igarota, hegoaldeko parke nazionaletaraino. Bertako ohitura eta bitxikeriei buruz ikasteko aukera izango da.
Saioa ostegun honetan, hilaren 14an, Irungo Amaia KZ aretoan izango da, eta sarrera doakoa izango da.
Zure abenturaren bila programan gonbidatuak bere bizipen eta esperientziak kontatzeko aukera du. Etiopiaz gain, Antartika, mendi handietara edo hurbileko tokietara egindako abenturak ere kontatu izan dira.
