'Emakumeen aztarnak Hondarribian' liburuak edizio berria izango du
Urte hasieran banatuko dute, doan. Edizio berria "ospatzeko" bi ekintza antolatu dituzte datorren asteazkenerako Parean elkarteak eta udalak.
2022an argitaratutako Emakumeen aztarnak Hondarribian liburu arrakastatsuaren edizio berri bat kaleratuko du Parean elkarteak. Urte berriarekin batera doan banatuko dutela jakinarazi dute. Liburutegian eskuratu ahal izango dute hondarribiarrek.
Proiektu honekin “emakumeek herri honen historiari egindako ekarpena gogorra ekarri eta goraipatu” nahi dute. Liburuan herriarekin lotura izan duten hamar emakumeren biografia jaso du Maria Jose Noain Maura historialariak. Emakume bakoitza hirigune historikoko puntu bati lotuta ageri da argitalpenean, “emakumearen historia pertsonala indartuz, eta oinez egin daitekeen paseo eder bat sortuz”. Testuez gain, Andrea Villamorren ilustrazioak ere ikus daitezke.
Emakume hauen bidez, hainbat gai “mahai gaineratu” nahi izan ditu Pareanek, ondorengoak: sorginkeria (Inesa Gaxenekin), gerra (Juana Mugarrietarekin), ezkontza (María Teresa Austriakoarekin), bidaiak (Hélène Feilletekin), itsasoa (Katalina Gijongoarekin), artea (Margaret Jordan Pattersonekin), sedukzioa (Justizeko neskarekin), merkataritza (Katalina Alkizakoarekin), boterea (Joana Gaztelakoarekin) eta indarkeria (Graciana Lizarragarekin).
Bi ekintza datorren asteazkenean
Edizio berria “ospatzeko” bi ekintza antolatu dituzte Eguberrietarako, biak datorren asteazkenean (hilak 27). Lehena, haur eta haien gurasoei zuzendutakoa izango da. Andrea Villamor Sanchez ilustratzailearekin Artista liburu tailerra egingo dute, 11:00etatik aurrera, Emeki Emakume Elkartearen egoitzan. 8-12 urte bitarteko haurrek ahalko dute parte hartu, eta gazteagoak heldu batekin joan beharko dira.
19:00etan, berriz, ibilbide historikoa eskainiko du Maria Jose Noain Maura historialariak, Arma Plazatik abiatuta.
Bi ekintzek aforo mugatua izango dutela aurreratu du udalak, eta hortaz, helbide honetara idatziz eman beharko dela izena.
