Topaketak, Migratzaileen Nazioarteko Egunaren harira
Abenduaren 18an da Migratzaileen Nazioarteko Eguna eta udalak bi topaketa antolatu ditu gaiaz hausnartzeko.
Abenduaren 18a Migratzaileen Nazioarteko Eguna da eta Irungo Udalak hainbat jarduera antolatu ditu “migratzaileei integratzen laguntzeko”.
Lehen jarduera ostegun honetan egingo da eta mahai inguru bat izango da. Irungo kirol talde eta entitateek kirolak esku hartzeko kohesio eta inklusio espazioak sortzeko betetzen duen eginkizunaren inguruko esperientziak kontatuko dituzte. San Migelgo gizarte zentroan izango da ekitaldia, 18:00etan, hilaren 14an.
Udalak kirolarekin lotu ohi diren “balioak” nabarmendu nahi ditu: “kirola esklusio sozialaren, berdintasunik ezaren eta diskriminazioaren kontra borrokatzeko, konfiantza eta autoestimua sustatzeko eta arau soziokulturalei eta estereotipoei aurre egiteko tresna bihurtzen dutenak”.
Mahaiaren inguruan bilduko dira Parean elkartekoak, Emakumeok Zast! proiektua azaltzeko; Zubia gizarteratze zentrokoak, Kirolarekin zubiak eraikiz proiektua aurkezteko; eta Landetxa Kirol Taldekoak, harrobiaren lanaz aritzera. Moderatzaile lanetan, Cristina Ubani arituko da, garapenerako lankidetzaren eta kirolaren esparruko berdintasun proiektuaren diseinatzaile eta zuzendaria.
“Irun, harrera hiri”
Topaketa bat ere antolatu du udalak Irun, harrera hiri izenburu pean eta hilaren 18an egingo da, San Migelgo adinekoen zentro sozialean ere, 17:00etatik 19:00etara.
Bertan, 1960ko eta 1970eko hamarkadetan Espainiatik Irunera migratu zuten adinekoei eta berriki atzerriko herrialdeetatik migratu duten gazteei elkarrekin hausnartzeko espazioa emango zaie. Jarduera horretan paret hartzeko gonbidapena eskuratu behar da eta horretarako 943 50 53 67 telefono zenbakira deitu behar da edota idatzi helbide elektroniko honetara.