Eskualdeko autonomoek bazkaria egingo dute ostiralean
Gabon hauetan elkartzeko apustua egingo dute Irun eta Hondarribiko autonomoek. Lehen edizioa izanik, aurtengo Gabonetako bazkaria 50 plazara mugatzea erabaki dute.
Irun eta Hondarribiko autonomo talde bat elkartu berri da, Gabonetan ohikoak diren enpresa bazkari berezi bat antolatzeko. “Langile autonomoek ez dugu lankideekin bazkari edo afari hauetaz disfrutatzeko aukera izaten. Horregatik, modu informalean, autonomoentzat Gabonetako bazkari bat antolatzeko ideia sortu zen, eta aurrera egin dugu”, adierazi dute taldekoek hedabideei bidalitako ohar batean. Hala, ostiral honetan (hilak 15) izango da bazkaria.
Lehen edizioa izanik, 50 plazara mugatu dute aurtengoa. Elkar ezagutzeko eta momentuaz gozatzeko arrazoi izateaz gainera, ostiralekoarekin “profesionalki interesgarriak izan daitezkeen proiektu eta esperientziak sortzeko ideia berriak azaleratzeko aukera” eman nahi diete autonomoei.
Izena emateko interesa dutenek lotura honetara jo beharko dute. “Espero dugu, urteetako esperientziarekin, inork galdu nahi ez duen erreferentziazko ekitaldia izatea”, erantsi dute antolatzaileek.
Izena ematen dutenek 11:30ean Hondarribiko Hermandadean egon beharko dira. Poteoa egingo dute lehenik, eta 13:30ean egingo dute bazkaria. Sabelak bete ondoren, musika eta dantza izango da. Herritar bakoitzak 60 euro ordaindu beharko ditu.
