Gazaren kontrako "genozidioa" salatu dute hondarribiarrek
Dozenaka herritar bildu zituen atzo Gernika-Palestina Deialdi Herritarrak. Israel Palestinan aplikatzen ari den "zigor kolektiboa" bukatzeko "konponbide justu eta demokratikoa" eskatu zuten.
Dozenaka hondarribiar bildu ziren atzo arratsaldean udaletxe parean, Palestinari elkartasuna adierazteko. Gernika-Palestina Deialdi Herritarrak antolatutako mobilizazioa egin zuten, eta besteak beste, “Gazan Israel egiten ari den genozidioarekin berehala amaitzeko” eskatu zuten: “honi konponbide justu eta demokratikoa eman behar zaio”, esan zuten.
Israel Palestinako herriari aplikatzen ari den “zigor kolektiboa” ere salatu nahi izan zuten eta Palestinaren “autodeterminazio eskubidea bermatu” behar dela aldarrikatu zuten, ozen. “Justiziarik gabe ezin da bakerik egon. Sortu den indarkeria zikloa, israeldarren eta palestinarren arteko arazoa modu baketsuan konpontzeko hamarkadetako aukera asegabeen eta egin gabekoen emaitza tragikoa da. Erabat onartezina da Israel GKE ezberdinei eta nazioarteko erakundeei azaltzen ari zaien mespretxua eta harrokeria. Nazioarteko eragileak ezin dira genozidio honen konplize izan. Munduko liderrek bakerako deia egin behar dute eta ez mendekurako deia. Genozidio honekin bukatzeko beren esku dagoen guztia egin dezaten interpelatzen ditugu”, erantsi zuten atzoko mobilizazioan.
75 urtez luzatu den gatazka honetan bakea lortzeko modu bakarra “Palestinako herriak giza eskubideen, duintasunaren eta nazio eskubideen alde dituen bidezko nahiak betetzea” dela ere nabarmendu zuten atzo. Horregatik, elkartasunerako eta konponbiderako deia egiten segitzea “ezinbestekotzat” jo dute. Mobilizatzen jarraitzeko premiaz ere aritu ziren, “sarraski hau gelditzeko”.
