Abuztuan herrian izan diren eraso matxistak arbuiatu dituzte talde guztiek
Eraso horien "gaitzespen sutsua" adierazi dute Abotsanitz, EAJ, PSE-EE eta EH Bildu taldeek, eta biktimei babes osoa adierazi nahi izan diete.
Emakumeen aurkako indarkeria eta indarkeria matxista arbuiatu dituzte, Martxoak 8 plazan. Abotsanitz, EAJ, PSE-EE eta EH Bildu taldeek adierazpen bateratu bat kaleratu berri dute, abuztuan udalerrian gertatu diren eraso sexistak arbuiatzeko. Eraso horien “gaitzespen sutsua” adierazi dute, eta biktimei babes osoa adierazi nahi izan diete.
Emakumeen giza eskubideen urraketarik ez onartzeko”borondate instituzional argia” adierazi dute ordezkaritza duten taldeek. Erasoa jasan duten emakumeei laguntza eskaini dieten herritarrei eskerrak eman dizkiete, “erasotuei laguntzeko prestutasuna balioan” jarriz.
“Emakumeen aurkako indarkeriak banakako erasotzaileak eta biktimak ditu, baina emakumeen gaineko kontrola eta nagusitasuna betikotzea helburu duen egiturazko arazo baten ondorio da. Beraz, indarkeria hori ez da gertaera isolatuen edo azalpenik ez duten gertakarien emaitza. Aitzitik, genero aurreiritziei buruzko sozializazio iraunkor baten ondoriorik larriena eta muturrekoena da”, dio kaleratu berri duten oharrak. Hemen osorik irakur daiteke.
Hobetzen jarraitzeko ahaleginean ez dutela etsiko ere esan dute, “gure bizikidetza demokratikoaren oinarriei eraso egiten dien arazo sozial bati erantzuteko behar diren neurri guztiekin. Erasoak salatu eta “modu irmoan erantzun ahal izateko” bideak erraztu nahi dituzte, “inoiz bakarrik senti ez daitezen lagunduz, erantzukizun kolektibo gisa suspertzen eta erreparatzen laguntzea, erasoek emakumeen artean beldurra sortzeko duten gaitasuna sozialki mugatzea eta horiei aurre egiteko tresnak ematea, eta erasotzaileek beren ekintzak zigorrik gabe geratzen ez direla eta ondorioak dituztela ulertzea”.
Aldundiak ere bat egin du taldeek kaleratutako irakurketarekin.
