Abuztu osoan zehar jarraituko dute Irunen bisita gidatuak egiten
Irungo nahiz kanpoko edonork parte har dezake horietan, betiere aurretik erreserba eginda. Ostegunero izango dira, 11:00etan eta 13:00etan.
Irungo Udalak eta Bidasoa Bizirikek bisita gidatuen programa jarri zuten abian uda hastearekin batera, eta udazkena iritsi arte indarrean egongo da Irunen. Hiriaren, Alde Zaharraren eta udaletxearen ohiko bisita gidatuez haratago, uda honetan irundarrek zein kanpotik bisitan datozenek aukera berri bat dute eskura, hirian barrena ibilaldi bat eginda Europako historiaren berri izateko.
Jarduera berri horrekin Irungo ondare historiko eta kulturala erakutsiko dute, hirian barrena ibilaldi bat eginda. Lehen ibilaldia uztailaren 20an egin zen, “arrakasta handiz”, antolatzaileen arabera, leku guztiak bete baitziren. Azken bisita hilaren 3an egitekoa zen, baina euriagatik bertan behera geratu zen azkenean. Edonola ere, abuztuaren 31ra arte jarraituko dute bisitak egiten.
Abuztu amaierara arte, beste sei bisita gidatu egingo dira, ostegunero, 11:00etan eta 13:00etan. Euskaraz nahiz gaztelaniaz eskainiko dituzte horiek, eta bertako nahiz kanpoko edonorentzat dago zabalik eskaintza. Parte hartu nahi izanez gero, aldez aurretik erreserba egin behar da Irungo Turismo Bulegoan, 943 02 07 32 telefonora deituta edo mezu bat bidalita helbide elektronikora.