Zesta-puntaren egun handia, bihar, Jostaldin
HPE Txapelketaren azken lehia, Master Series finala eta Grand Slameko A taldekoen lehen partida izango dira ikusgai 19:00etatik aurrera.
Artxiboko argazkia. 
Hondarribiko Jostaldi pilotalekua bihar, ostiralarekin, zesta-puntaren agertoki bihurtuko da. Emanaldia ohi baino lehen hasiko da, 19:00etan, HPE Txapelketaren azken norgehiagokarekin. Lete-Garitagoitia nor baino nor arituko dira Txanton-Bereauren kontra.
Horien segidan, Master Series finalaren txanda helduko da. Julen Basterra hondarribiarra eta Ibarluzea bikotea, Etxeberri eta Beteluren aurka arituko dira partida horretan.
Eta azkenik, baina ez horregatik merezimendu gutxiagorekin, Grand Slameko A taldekoen lehenengo partida. Estreinako norgehiagoka horretan Goikoetxea-Zabala eta Aaron-Del Rio arituko dira. Lehenak faborito bezala irtengo badira ere pilotalekura, hori berretsi eta sorpresa gazi-gozoak ekidin beharko dituzte bihar.
Goikoetxearen azken aldiko partidak zapore gozoa uzten ari dira ikuslegoan. Izan ere, aste gutxi joan dira sasoi hau bukatuta erretiroa hartuko zuela iragarri zuenetik, eta zaleek badakite asti gutxi dutela kirolariaren trebeziaz gozatu ahal izateko. Horretarako parada hobeezina izango dute, hain zuzen, Jostaldin. Zestalari historikoa lanean ikusteko azken aukeretakoa izan liteke biharkoa.
2007an hondarribiar frontoia inauguratu zenetik eta zesta-punta jokoan sartu zenetik, aurrelari zumaiarrak tanto ugari markatu ditu pareta horien artean. Memorian berezi gordeta izango du, ziur aski, 2012ko indibidualaren finala, 30-28 nagusitu zelarik Lopezen kontra. Zalantzarik gabe, azken garaiotako finalik handienetako bat.
