Herriko abesbatzek hitzordu garrantzitsua izango dute maiatzaren 21ean
XXXII. Herri Kanta Jaialdia egingo dute, goizez. Parte hartzeko interesa duten abesbatzek maiatzaren 3a baino lehen eman beharko dute izena.
Aurten ere Herri Kanta Jaialdiaz gozatzeko aukera izango dute hondarribiarrek, maiatzaren 21ean izango da. Goizez egingo dute (11:30ean hasita), Gipuzkoa plazan.
Bertan parte hartzeko interesa duten abesbatzek BAZen izena eman beharko dute, maiatzaren 3ko 13:00ak baino lehen. Taldearen izena, zenbat partaidek osatzen duten taldea, zuzendariaren izena, harremanetarako pertsonaren izena, telefonoa eta helbide elektronikoa zehaztu beharko dira. Bazkarira joango diren partaideen kopurua ere jakinarazi beharko da.
Parte hartu ahal izateko, honako baldintzak bete beharko dituzte abesbatzek: ahots berdinekoak edo mistoak izan litezke eta bertako kideak 16 urtez gorakoak izango dira; abesbatza bakoitza gutxienez zortzi kidekoa izango da; eta talde bakoitzeko kideen %80 gutxienez, hondarribiarrak izango dira, Hondarribian jaioak edo bertan bizi direnak alegia.
Talde bakoitzak hiru kanta abestuko ditu.
