Irun Ekintza itunaren gaineko balantzea egin du udalak
Iazko balorazioaz gain, egitasmoaren barruko hurrengo pausoak iragarri ditu Miguel Angel Paezek. Itunak "hainbat ekintza sustatuko" dituela gaineratu du, 1.628.782,25 euroko aurrekontuarekin.
Irungo Udalak Irun Ekintza Garapen Ekonomikoaren eta Enpleguaren aldeko Itunaren gaineko balorazioa egin berri du. Balorazioaz gain, egitasmoaren barruko hurrengo pausoak iragarri ditu Miguel Angel Paezek. Otsailaren 21ean aurkeztu zuen balantzea Kontseilu Nagusian. Gaurko agerraldian, Paezekin batera Mondragon Unibertsitateko Lander Beloki eta Irun Ekintza itunaren mahaiko koordinatzaile Ismene Tapia izan dira.
“Irun Ekintzan tokiko ekonomia sustatzeko lan egiten duten instituzio, enpresa, prestakuntza zentro eta entitate sozialak koordinatzen dituen foroa da. Sareko lanari esker, hiri gisa hazten jarraitzeko, jarduera ekonomikoa sustatzeko eta sektore guztien beharrei erantzuteko baliabideak optimizatzen ditugu, zaurgarrienen laneratzea gogoan betiere”, esan du Paezek. Irun Ekintza itunaren helburu orokorra “hiriko ekonomia eta gizartea modu jasangarrian suspertzeko baldintzak sustatzea” dela gogorazi du ordezkariak, “elkarlanean oinarritzen den sistema ekonomiko berritzaile eta zirkular baten alde” egiten dutela, “non gure enpresak talentuari eusteko eta hura erakartzeko gai diren eta pertsona guziek duten lekua”.
Itunak “hainbat ekintza sustatuko” dituela gaineratu du, 1.628.782,25 euroko aurrekontuarekin. Gainera, aldi baterako 75 bat kontratu sustatu ahalko dituztela erantsi du Paezek.
Iaztik Lander Belokik ekonomia zirkularrean ekintzailetza ekintzak eta enpresa berriak finkatzeko eta eredu eraginkorretarantz eraldatzeko egindako ekintzak nabarmendu ditu ordezkariak, baita enpresa finkatuetan eraginkortasuna eta digitalizazioa sustatzeko ekintzak ere.
Ismene Tapiak, berriz, iazko prestakuntzako jardueretako batzuk zehaztu ditu, hala nola, eskorgak gidatzeko ziurtagiria eta IT txartela eskuratzekoak, elikagaien manipulazioari buruzkoa, ostalaritza eta turismorako frantses eskolak eta eraikuntza lanetako arriskuen prebentziorako ikastaroa.
Azkenik, Paezek 2023ko jarduerak errepasatu ditu. Batetik, ekonomia linealetik ekonomia zirkularrera igarotzea bultzatzeko neurriak hartuko dituztela esan du, “gure egitura ekonomikoa gizartearen eskakizun berrietara eta araudi berrira egokitzeko”. Bestetik, udalak enplegua sortzeko hainbat neurri hartzeko asmoa duela ere adierazi du.