Hitzordu bikoitza izango dute errugbi zaleek hilaren 15ean
Nazioarteko Errugbi Eskolen Topaketa egingo dute Irunen, Txingudi Errugbi Taldearen egitasmoz. Goizean haurrek partidak jokatuko dituzte eta arratsaldean San Juan plaza hartuko dute.
Txingudi Errugbi Taldea Datorren hilaren 15erako (larunbata da) Nazioarteko Errugbi Eskolen Topaketa egingo dute Irunen, Txingudi Errugbi Taldearen egitasmoz. Bi hitzordu izango dituzte errugbi zaleek. Goizean jatorri ezberdinetako zortzi errugbi eskolek euren artean jokatuko dute Plaiaundin. Bazkalostean ordea, Irungo erdigunea hartuko dute.
Goizean, 10-12 urte bitarteko haurrak lehiatuko dira, laurehun bat lagun elkartzea aurreikusi du klubak. Baztan Menditarrak (Nafarroa), Soragazteak (Gipuzkoa), Sarako Izarra (Lapurdi), Emak Hor Arrangoitze-Basusarri (Lapurdi), RC Rioja (Errioxa), RGC Covadonga (Asturias) eta Rugby Union Norte (Kantabria) taldeek izango dute ordezkaritza. 7 minutuko partidak jokatuko dituzte.
“Pozik gaude horrelako ekimenak bultzatzeaz, gure eskoletako jokalari eta trebatzaileentzako egundoko esperientzia izango dela ziur gaude”, esan du Iñigo Aizpuruak, Txingudiko eskolako zuzendariak. “Jatorri hain ezberdinetako klubak bilatu ditugu bai jokalariek zein guraso edo eskolako partaideek beste errealitateak eta lan egiteko moduak ikus ditzagun. Txikiek ondo pasatzeaz harago, topaketa honek ekarpenak egingo dizkigula uste dugu”, erantsi du.
Partiden ondoren partaide guztiek sari bana jasoko dute, eta hirugarren denboraz gozatu ahal izango dute. 14:30ean, goiza biribiltzeko, Txingudiren 16 urte azpikoen taldeak Uribealdearen kontra partida jokatuko du.
17:00etan berriz, kalejiran abiatuko dira errugbilariak Irungo erdigunerantz. Bertan, udaletxe parean jarriko duten errugbi zelai txikian musika, zozketak eta beste zenbait ekitaldi egingo dituzte.
