"Datozen asteetan" hasiko dira Anakako espaloi berriak zolatzen
Jose Antonio Santano alkateak eta Cristina Laborda Obretako ordezkariak Anakako obren lehenengo mugimenduen egoera ezagutzeko bisita egin dute.
Bisita egin dute ordezkari politiko eta teknikoek Anaka inugurko obretara. 
Jose Antonio Santano Irungo alkateak eta Cristina Laborda Obretako ordezkariak Anakako obren lehenengo mugimenduen egoera ezagutzeko bisita egin dute. Proiektua 2020an jarri zuen udalak jendaurrean, baina pandemiagatik geldiarazi eta joan den azaroan berrekin lanei.
Jarduketen aurrekontua 6,8 milioi euro ingurukoa da, eta 20.000 metro koadroko azalerari eragingo dio: familia bakarreko etxebizitzen 133 partzela, 15 etxebizitza-eraikin eta 2 ekipamendu-eraikin. Berrurbanizazioa faseka egingo dute; eremuz eremu, inguru guztia osatu arte.
Lehen fasearekin iazko azaroan hasi ziren, eta bertako lanak —Florencio Iratxeta plazan eta Fabiola erreginaren eta Isabel I.a erreginaren kaleetan ari dira obretan, eta baita azken bi kale horien artean dauden Gaskoi kalearen eta Eulalia infanta kalearen zatietan ere— 2024ko urtarrilerako bukatu beharko lirateke, aurreikuspenen arabera.
Obrako lehen lan horietan, saneamendu sareak ezartzen ari dira, eta, aldi berean, gainerako hiri zerbitzuen —telefonia, energia elektrikoa, gasa eta argiteria— kanalizazioak egiten ari dira. Joan den astean hasi ziren zolatze lanak, zintarriak jarrita, eta asmoa da datozen asteetan hiri kanalizazioak jartzeko lanekin bukatu eta bideak eta espaloiak zolatzeko lanetan aurrera egingo dutela.
