Aldundiaren udako programetan izena emateko epea zabalik
Aldundiak 1.431 plaza eskainiko ditu aurtengo udan, udalekuetan eta Gazte Oporraldiak programetan. Hilaren 28an amaituko da izena emateko aukera.
Izena emateko epea zabaldu du aldundiak gaur. Antolatzen dituen udako programetan izena emateko epea zabalik du Gipuzkoako Foru Aldundiak. Hala, gaurtik eta hilaren 28ra arte izango da aukera izena emateko udalekuetan, zein Gazte Oporraldiak programetan. Guztira, 1.431 plaza dira zozkatuko dituztenak izena ematen duten haur eta agzteen artean, 1.050 Udalekuak programan eta 381 Gazte Oporraldietan.
Udalekuak, 7-13 urte arteko haurrei begirakoak dira (2010-2016 urte artean jaiotakoentzat) eta 14-17 urte bitartekoentzat Gazte Oporraldiak (2006-2009 urte artean jaiotakoentzat), eta plazen %5 hezkuntza behar bereziak dituzten haur eta gazteentzat izango dira.
Udalekuetako haurren egonaldiak zazpi egunekoak izango dira, eta utzailaren 1ean hasita, uztailaren 29an amaituko dira. Gazteen egonaldiak, berriz, zazpi eta hamabi egun artekoak izango dira, eta abuztuaren 7an amaituko dira. Hizkuntzari dagokionean, berriz, udalekuetako txanda batzuk euskaraz izango dira, eta beste batzuk, elebidunak. Gazte Oporraldietako txanda batzuk euskaraz izango dira, eta beste batzuk gaztelaniaz.
Izena emateko garaian, bakarka egin dezakete interesdunek, edota hiru laguneko taldetan, gaurtik eta hilaren 28ra arte, internet bidez, Udako Programen bulegoan, edota kanpainan parte hartzen duten udal bulegoetan. Zozketa apirilaren 17an egingo dute eta orduan jakinaraziko da emaitza parte hartzen duten bulegoetan eta interneten. Erreklamazio epea, berriz, hilaren 29an eta 30ean izango da. Plaza lortu dutenek apirilaren 18tik 26ra bitartean izango dute behin betiko izena emateko epea.
Udalekuen gaineko informazio guztia hemen klik eginda; Gazte Oporraldiena, hemen klik eginda.
Udabizi, aisialdi eskaintza bilatzailea
Aldundiko Gazteria Zuzendaritzak Udabizi bilatzailearen garrantzia nabarmendu du bestalde. Iaz 7.000 bisita jaso zituen bilatzaile horrek, eta bertan, Gipuzkoako elkarte, erakunde eta entitate ezberdinek antolatutako udako aisialdi eskaintzak daude bilduta, baita alor horretako lan eskaintzak ere.
