Irungo Udalak eta elkarte feminista nahiz emakume elkarteek egitarau oparoa antolatu dute. Egitarauak martxoaren 8a badu ere ardatz, datozen bi asteetarako antolatu dituzte ekimenak.
Gaur eguerdian, Irungo Martxoaren 8a kalean elkartu dira udaleko Berdintasun saileko eta hiriko elkarte feministetako kideak. Gure Andreak, Argoiak, Bidasoaldeko Elkarte Feminista, Irungo Emakumeen Etxea eta Uxoa elkarteetako kideek aurtengo martxoaren 8ari begira (datorren asteazkena) antolatu duten egitarau oparoa aurkeztu dute. Miren Etxebeste Berdintasun zinegotziak parte hartu du agerraldian, eta eguna eta hilabetearen (martxoaren) izaera aldarrikatzailea azpimarratu du: “martxoa emakume eta gizonen arteko berdintasuna aldarrikatzeko hilabete izatea nahi dugu”. Hortaz gain, Berdintasun sailaren bigarren helburua lortu dutela adierazi du: “Martxoaren 8ko programak, zeharka bada ere, udaleko gainontzeko departamentu eta sailei eragitea lortu dugu, guztien inplikazioa lortuz”.
Hemen sakatuta, udalaren eta emakume elkarte nahiz elkarte feministen lankidetzatik antolatu dituzten ekimen guztiak kontsultatu daitezke. Tartean, antzerki emanaldiak, hitzaldi eta tailerrak, edota txokolateak lagundutako hizketaldiak antolatu dituzte.
Manifestazioa arratsaldean
M8 Asanblada Feministak, ohi bezala, manifestazioa antolatu du datorren asteazkenerako. Aurten ere, iazko formatua mantenduko dute: zutabe bana abiatuko da Urruña eta Hondarribitik. Lehena “Charles Pucheutik” (Urruña) abiatuko da, 17:45ean; bigarrena, 17:30ean Marxoaren 8 plazatik.
Urruñako zutabea Hapetenia Behetik (Hendaia) igaroko da 18:15ean, Santiago Zubitik (18:30ean) Gernikako Arbola plazaraino (18:40ean) iristeko. Hondarribikoa Zubimuxutik igaroko da 18:15ean. Arratsaldeko 19:00etan, biek ala biek bat egingo dute Ipar Euskal Herria hiribideak eta Kolon Pasealekuak bat egiten duten bidegurutzean, eta bertatik Istillaga plazara eta Santiagoko frontoira jaitsiko dira. Manifestazioaren bukaeran, sortu berri den Emakumeen Etxea elkarteko kideek Penkoletas Sisters gonbidatu dute, emanaldia eskaini dezaten.
Miren Etxebestek, era berean, asteazken eguerdian Emakumeen Etxean (Istillaga plaza, 8) gunea sortzeko prozesua nolakoa izan den aurkeztu eta hausnartzeko tartea antolatuko dutela gaineratu du. Horren ondoren, luntxa eskainiko dute erabiltzaileentzat.
