Emakumeen Etxea azken fasean sartu da
Istillaga plazan egongo den guneak hainbat gela izango ditu. Etxebeste eta Laborda zinegotziek 63 emakumek gunearen diseinua erabakitzeko parte hartu dutela nabarmendu dute.
Irungo Emakumeen Etxearen proiektua azken fasean sartu da. Udalak Istillaga plazako 8.a egokituko du emakume elkarteek haien jarduna garatu dezaten. Udalaren jabetzako lokalak 240 metro karratuko azalera du, eta obrak Urbycolan enpresari esleitu dizkiote. Sei hilabete izango ditu enpresak lanak egiteko, 466.490 euroko aurrekontuarekin.
Emakumeen Etxearen sarrera nagusia plazan bertan egongo da, eta bertatik erabilera anitzeko areto nagusira sartuko dira erabiltzaileak. Guneak erabilera anitzeko beste gela txikiago bat izango du. Bestela, Emakumeen Etxeak harrera gunea, teknikarien gela, bi bulego, liburutegia edota materiala gordetzeko bi armairu izango ditu. Etxearen ezaugarriak erabakitzeko parte-hartze prozesu bat garatu du udalak: lau orduko hamar saio antolatu dituzte (online zein parez pare), eta orotara 63 emakumek parte hartu dute. Udalaren arabera, horrela, hiriko mugimendu feministekin harremana estutu da. Emakumeek etxearen balorazio positiboa egin dutela azpimarratu dute ere.
Miren Etxebeste Berdintasun zinegotzia eta Cristina Laborda Obren zinegotzia izan dira aurkezpenean. Etxebestek lanak martxa onean egiten ari direla azpimarratu du, eta pozarren itxaroten ari direla Emakumeen Etxearen irekiera. Labordak, hortaz gain, partaidetza prozesuan jarri du arreta: “obra-proiektua idazterakoan kontuan izan dira emakumeekin abian jarritako partaidetza-prozesuan jasotako beharrak”.
