A25aren harira, Hondarribiko Udalak adierazpen bateratua egin du
EUDELek egin du adierazpenaren proposamena, eta EAJ, PSE-EE, eta Abotsanitzek onartu dute proposamena. EH Bildu aurka agertu da.
Emakumeen Kontrako Indarkeria Gaurko egunarekin, Emakumeenganako Indarkeriaren Aurkako Nazioarteko Egunarekin, Hondarribiko Udalak adierazpena kaleratu du, EAJ, Abotsanitz eta PSE-EEren udal taldeen babesarekin. Proposamena EUDEL Euskadiko Udalen elkarteak egin du, eta EH Bildu adostasunetik at gelditu da.
Udalaren arabera, emakume askok aurrerapauso garrantzitsuak erdietsi dituzte berdintasunaren bidean; izan mugimendu feministaren bidez edo banaka. Indarkeria matxistak, ordea, “emakumeen kontrola eta askatasuna murriztea” du helburu, eta berdintasun hori arriskuan jartzen du. Zentzu horretan, azpimarra jarri dute jai eta sozializazio eremuetan ematen diren erasoetan; emakumeen askatasuna murriztu eta haiei kale zein herriko espazio publikoez jabetzea oztopatzen dietelako. Hori dela eta, politika nahiz administrazio publikoek “emakume eta neskek haien herritartasuna gauza dezaten” duten konpromiso eta betebeharra aldarrikatu dute. Bide horretan, hainbat lan lerro mahai gaineratu ditu udalak, aurrerantzean herri mailan egin beharrekoei buruz:
Hondarribiko Udalak bere gain hartzen dituen konpromisoak:
1. Era sakonean ezagutzea emakumeei espazio publikoa ukatzeko modu anitzak, tokiko politiken diseinuan eta garapenean kontuan hartzeko.
2. Lege eta politika integralen ezarpen eraginkorra bultzatzea, espazio publikoetan sexu-indarkeriari aurrea hartzeko eta erantzuteko. Eta, era berean, gaitasunak, sentsibilizazioa, komunitate-mobilizazioa eta beste estrategia batzuk garatzea.
3. Aldaketak bultzatzea jarreretan eta portaeretan, emakumeek eta neskatoek indarkeriarik gabeko espazioez gozatzeko dituzten eskubideak bermatze aldera. Hori gauzatzeko, errespetuzko genero-harremanak, genero-berdintasuna eta segurtasuna sustatzea espazio publikoetan.
4. Inbertsioak sustatzea, espazio publikoetan hautemandako segurtasun errealari dagokionez; genero-ikuspegia ziurtatzea hiri-plangintzan, emakumeen beharrizanak kontuan har daitezen.
5. Berdinsarea tokiko jardunbide sare gisa indartzea, ekimenei eta jardunbide egokiei buruzko ezagutza-trukea errazteko. Eta hiri eta herri seguru eta inklusiboak lortzeko, emakumeentzat eta neskentzat.
6. Beste erakunde eta administrazio batzuekin lankidetzan aritzea, Emakunde eta foru-aldundiekin besteak beste; gizarte-taldeekin, feministekin, ere, emakumeek eta neskek aukera izan dezaten espazio publikoaz segurtasunez eta berdintasunez gozatzeko.
Hona hemen adierazpena oso osorik.
EH Bildu, adierazpenetik kanpo
EH Bilduk ez du agiria sinatu, koalizioaren ustez hainbat arrazoi tarteko. Alde batetik, proposatutako eredua moldatzeko aldaketak egiteko aukerarik izan ez dutela adierazi dute. Bestetik, Hondarribiak ez duelako berdintasun teknikaririk (Gipuzkoako udalerri bakarra da Hondarribia horretan). Hirugarrenik, berdintasun printzipioa babesten dutela adierazi dutelako, eta jai eremuko berdintasuna aipatu dute. Bukatzeko, koalizio subiranistak gaurko adierazpena zuriketa ariketa dela salatu dutelako.
