Talaiako Guraso eta Familien Elkartea: "Kezkatuta gaude"
Elkartetik udal gobernuari konponbide bat emateko eskatu diote, bai eta genero-arrakala ezabatzeko egiten den edozein urrats babestuko dutela adierazi dute.
Ikastetxe publikoetako zikinkeria. Ikasturte berria hastear dagoen honetan Talaiako Guraso eta Familien Elkartea “kezkatuta” azaldu da ikastetxe publikoen garbitasun ezaren egoera dela-eta. Irailaren 1ean udal garbitzaileek graba mugagabea hasiko dute eta joan den ikasturteko Satarka, Biteri eta Bordariko eraikinetan izan zen “zikinkeria maila oso kezkagarria” izanik, aurtengoari begira “beldur” dira.
Zikinkeria bere horretan arazo izateaz gain, horrek eragin ditzakeen osasun arazoak ere kezkatzen ditu. Hori dela-eta egoera salatu nahi izan dute: “Aurreko ikasturtean ikasle eta irakasle batzuk osasun arazoak izan zituzten, eta zikinkeria areagotu besterik ez da egin”. Eusko Jaurlaritzako Osasun Publikoko Sailak egindako ikuskaritza-txostenak zikinkeriaren eta osasun arazoen arteko harremana berretsi du.
Ikastetxe publikoen egoera hobetzeko konponbidea enpresaren eta langileen esku dagoela adierazi diete. “Ezin dugu ahaztu garbiketa zerbitzuaren arduraduna udala dela”, diote elkartekoek, eta beraz, udal gobernuari konponbide bat emateko eskatu diote.
Azkenik, oro har oso feminizatuta dauden lanetan, hala nola garbiketan edo zaintzan, gertatzen den prekarietate egoera mahai gainean jarri eta genero-arrakala ezabatzeko egiten den edozein urrats babestuko dutela adierazi dute.
