Osoko bilkurak esleitu gabe utzitako 3 milioiak dekretu bidez onetsiko dituztela salatu du EAJk
Erabili gabe utzitako hiru milioi euro horiek "erabakitzeko ahalmenik ez duen Bozeramaile Batzordera eraman eta alkateak dekretu bidez onetsiko" dituela salatu dute. Kudeaketa gardentasuna eta gainerako indar politikoekin lankidetza eskatu diote alkateari.
Josu Iguiñiz, EAJ-ko zinegotzia eta Xabier Iridoy, Irungo EAJko bozeramailea Irungo EAJk maiz adierazi du aurrekontuei dagokionez “baliabide guztiak erabiltzeko” beharra, “ezer ez gordetzea” funtsezkotzat jo baitute jeltzaleek. Zentzu horretan, beste behin leporatu diote udal gobernuari proposamen hori ez onartu izana. “Urtarrilaren 31an 2022ko aurrekontuak onartu ziren, eta likidezia falta argudiatuz, zuzenketak atzera bota ziren. Ondorioz, hiru diru laguntzetatik eratorriak ziren 3 milioi euro erabili gabe utzi ziren”, salatu dute amorruz.
Jeltzaleen proposamenak ez dituztela sartu nahi izan erantsi dute, “oraindik diru laguntza ofizializatu gabez zeudela argudiatuz”.
Orain, aipatutako hiru milioi horiek hil honen amaieran “Alkatearen Dekretuz esleituko direla” jakin du EAJk. “Gobernuak erabakitzeko ahalmenik ez duen Bozeramaile Batzordera eramango ditu bere proposamenak, eta ondoren, alkateak dekretu bidez onetsiko ditu.”. Horregatik “kudeaketa gardentasuna eta gainerako indar politikoekin lankidetza” eskatu diote Jose Antonio Santano buru den gobernuari. “Alkatetza dekretuak ez dira kudeaketak bideratzeko, ez formak, ezta moduak ere”.
Horregatik guztiagatik, 2.475.000 euroko balioa zuten zenbait proposamen egin dituzte jeltzaleek, ondorengoak: Poxpologile kalearen berrurbanizazioa (650.000 eurogatik, eta 850.000 euroko konpromisoarekin); Ermita kalearen berrurbanizazioa ((375.000 euro); Lapize kalearen berrurbanizazioa (600.000 euro, eta ondoren, 900.000 euroko konpromisoarekin); Juan Thalamas Labandibar eraikinaren erosketa (55.800.000 euro); Mendibil eremuaren beharren azterketa (20.000 euro); eta, Mendibil eremua berrurbanizatzeko proiektua (30.000 euro).
Alkateak dagoeneko jaso ditu proposamen horiek, eta taldekoek erregistratu dituzte jada. “EAJtik Irunek behar dituen proiektuen aldeko apustu anbiziosoa egiten dugu. Eta horregatik, proposamenak eginez, gure lankidetza eskaintzen diogu Udal Gobernuari, Irun hiriarentzako onak diren proiektuak atzeratzen jarraitu ez daitezen. Askok eta askok ez dugu agintzen gaituztenen kudeaketa ereduarekin bat egiten”.
