Gipuzkoako garapen agentziek bilkura egin dute Irunen
Gipuzkoako Foru Aldundiarekin sinatutako hitzarmenaren diagnostikoa egiteaz gain, 2022rako helburuak finkatu eta ekarpenak egin dituzte.
Gipuzkoako garapen agentziek bilkura egin dute Ficoban.
Gipuzkoako 11 garapen agentziek bilkura egin zuten atzo goizean, Ficoba erakustazokan. Gipuzkoako Foru Aldundiarekin sinatutako hitzarmenaren gaineko diagnostikoa egiteaz gain, 2022. urterako helburuak finkatu eta ekarpenak egin zituzten bertan.
Bidasoa Bizirik-etik zehaztu dutenez, Diputazioaren eta tokiko garapen agentzien arteko elkarlana sustatzeko helburua du hitzarmenak, «maila anitzeko lankidetza gobernantza garatzeko oinarriak ezarriz». Zentzu horretan, lurraldearen garapena «zentzu zabalenean» garatzea bilatzen du, halaber, hitzarmenak.
Hori horrela, agentziek hiru erronka nagusiri aurre egin beharko diete 2022an: «Gobernantzaren izaera horizontala indartzea, garapen agentziek programen esparruan duten rola adostea, eta beste arlo batzuk hitzarmenean sartzea».
Azkenik, garapen agentziek euren lanaren «aintzatespena» aldarrikatu dute. «Estrategiak zehazteko eta eskualdeen eta udalerrien garapen sozioekonomikorako jarduerak inplementatzeko» udalen tresna direla nabarmendu dute, batetik, eta «tokiko garapen prozesuak errazteko agente bideratzaile gisa duten eginkizuna» aitortzea galdegin dute, bestetik.
