Abian da Bide-LAN, "eskualdeko kolektibo zaurgarrien enplegu aukerak hobetzeko"
"Lan merkatutik urrun dauden edo sartzeko zailtasunak dituzten pertsonentzat" prestatutako proiektua da. Aurreikuspenen arabera, 120 lagunek parte hartuko dute bigarren edizio honetan.
Atzo aurkeztu zuten bigarren edizioa. Eskualdeko bi udalek, Bidasoa Bizirik-en bitartez, Bida-LAN proiektua jarri dute martxan bigarrenez jarraian. Irun Ekintzan-eko Kualifikazio eta Lan Munduratze Mahaiko eskualdeko erakundeen arteko lankidetzatik sortutako proiektu da, “eskualdeko kolektibo zaurgarrien enplegu aukerak hobetzeko” helburuarekin sortutakoa.
“Bidasoa eskualdeak erronka handia du enpleguarekin, are gehiago gaur egun, osasun alarmak eragindako egoera dela eta. Eta erronka handi horren barruan arazo larriagoa dago: zaurgarriak diren eta, beraz, lana eskuratzeko zailtasun handienak dituzten pertsonak lan merkatuan sartzea. Bidasoa Bizirik-ek urteak
daramatza pertsona horiei lana bilatzen laguntzeko lanean, lan merkatuan sartzeko zailtasunak dituzten pertsonei zuzendutako prestakuntza, laguntza eta programen bidez”, esan du Miguel Angel Paez Bidasoa Bizirik-eko presidenteak.
Atzoko agerraldian gaineratu zutenez, “lan merkatutik urrun dauden edo sartzeko zailtasunak dituzten pertsonentzat” prestatutako proiektua da. Eta aurreikuspenen arabera, 120 lagunek parte hartuko dute bigarren honetan, iazko kopuruaren bikoitza.
Lau ataletan banatuko dute proiektua. Batetik, ibilbide profesionalak garatzeko lehen prozesu pertsonalizatua egingo dute partaideekin, “malgua eta moldakorra, pertsonen ezaugarri eta inguruabarrekin bat datozen ibilbideak diseinatu ahal izateko”. Bigarren atalean jarduera aktibazio eta produktibitate pertsonaleko prozesu bati ekingo diote, eta bertan partaideek euren gaitasun pertsonalak eta digitalak garatuko dituzte. Hirugarren jarduera hilaren 14an hasiko dute; oinarrizko ostatu teknikak, eraikuntzako laneko arriskuen prebentzioa, bizikleta mekanika, arrandegiko arreta eta salmenta eta lehen mailako profesionaltasun ziurtagiria kargak manipulatzeko eta ehungintzako eta larrugintzako konponketak eta egokitzapenak egiteko prestakuntza jasoko dute. Azkenik, lan merkatuarekin lotzeko fase batean sartuko dira, eta horretan enpresako prestakuntza prozesuak eta enplegu azokak antolatuko dituzte.
Lehen bi jarduerak Bidasoa Bizirik-en egoitzetan egingo dituzte. Prestakuntza fase horretan La Salle ikastetxea eta Mendibil Elkarte Pedagokikoa ariko dira elkarlanean.
