Habitatak berreskuratzeko lanak hasi ditu Diputazioak Jaizkibelen
Guztira, 3,13 hektareako azaleran esku hartuko du aldundiak Artzu azpialdean; eukaliptoak moztea eta ametzak landatzea da helburua.
Habitatak berreskuratzeko lanean hasi da aldundia Jaizkibelen.
Jaizkibel mendiko habitatak berreskuratzeko lanei ekin die Gipuzkoako Foru Aldundiak, Hondarribiko Udalak gaur jakinarazi duenez. Artzu azpialdean esku hartuko du Diputazioak, 3,13 hektareako azaleran. Zabaldutako informazioaren arabera, eukaliptoak (Eucalyptus nitens) kentzea eta horren ordez ametzak (Quercus pyrenaica) eta bertako beste espezie laguntzaileak landatzea da esku hartzearen helburua.
Jaizkibel mendiko «kontserbazio neurrien lehen helburuan harizti eta ameztien berreskurapena jasotzen da», adierazi du Juan Luis Silanes Hondarribiko Ingurumen zinegotziak, «besteak beste, espezie exotikoak hartutako sailak lehengoratzea». Zentzu horretan, 2017. urtetik eukaliptoak Jaizkibeletik ateratzeko hainbat saiakera egin dituztela ezagutarazi du hautetsiak.
Denera, 1.200 zuhaitz moztuko dituzte Artzu azpian. Abenduaren 31ra arte luzatuko direla lanak jakinarazi du udalak.
