Brioche Pasquierreko langile baten kaleratzea salatu du bertako enpresa batzordeak
Langile bat bidegabe kaleratu dutela salatu du enpresako langileen batzordeak. Beste langileenganako "mehatxua" dela adierazi dute.
Enpresa batzordeko kideak. Brioche Pasquier enpresak produkzio aldeko hiru lerroetako batean lanean ari den langile baten kaleratzea salatu du bertako enpresa batzordeak. “Oso gertakari larria da”, esan dute komitekideek. “Enpresa horrek kontratu hori deuseztu duen moduak agerian uzten du enpresak aplikatu nahi duen diziplina boterearen abusua, peccata minuta gisa har daitekeen zerbait egite hutsagatik”. Langilea inolako kalte-ordainik gabe izan da kaleratua.
Neurri hori, langile guztienganako mehatxua dela adierazi dute langileen ordezkariek: “Horrelako ekintzek beldurra, zatiketa eta ezinegona sortzen dute langileen artean, eta enpresarekiko mesfidantza handia. Pertsona hau beste langileoi abisua emateko erabili dute”.
Komitekideek jakinarazi dute langileari idatzitako kaleratze gutunean “hutsaren hurrengo edo balio gutxiko zenbait gertaera” egozten zaizkiola beharginari. “Are gehiago, ez oso modu trebean, enpresa bera da bere buruari xantaia egiteko arrazoitzat har daitezkeen gaiak argudiatzen dituena”, esan du batzordeak. Alta, langilearekin batzordekide bat egotea debekatu du enpresak, kaleratzea egikaritu denean izan dutelako batzordekideek egoeraren berri. “Horrek susmoa sortzen du berdintasun printzipioa benetan errespetatu den, ala ez”.
Batzordeak —eratu berria da— adierazi du enpresarekin elkar ulertzeko eta giro ona izateko borondatea izan duela, “akordioen eta proposamenen bidez”. Baina gertatutakoak langileen interes kolektiboak mehatxupean jartzen dituela zehaztu dute. “Ez diogu Brioche Pasquier Irunei gauzak horrela egiten utziko. Kaleratzea baliogabetzea eta berehala lanera buelta dadila eskatzen diogu enpresari”.
