[Galeria] 25 urte bidea hasi zutenetik
Desfilerik gabeko bigarren urtean, elkarretaratzea egin du Jaizkibel konpainiak, 25 urte bete direlako lehen aldiz Alardean parte hartzeko saiakera egin zutenetik hainbat emakumek. Goizean botoa berritzera ere igo dira Guadalupeko Santutegira.
Lehen urteetan erabiltzen zuten kartela atera zuen kalera Jaizkibel Konpainiak, 2021ko irailaren 8an. Gaur 25 urte bete dira Hondarribiko hainbat emakumek, lehenengoz, Alardean parte hartzeko saiakera egin zutela. Hasiera hura eta Jaizkibel konpainiaren urteurrena gogoratzeko asmoz elkarretaratzea egin dute Martxoak 8 plazan. «Bidea ireki zutelako» elkartu direla esanez eskertu die bertaratutakoei azaldu izana Oihana Etxebarrietak Jaizkibel konpainiako kapitainak.
Hondarribiko Alardeko 22. konpainia izateko eskaria egin zuen Jaizkibel konpainiak uztailean “bizi dugun gatazkari buelta” emateko helburuarekin. Horren gainean “ardura duten eta elkarrizketa prozesua sustatu beharko luketenen aldetik” erantzunik jaso ez dutela adierazi du kapitainak, nahiz eta proposamena jaso izana onartu. Etxebarrietak azaldu du begi onez jaso dutela planteamendua hainbat herritarrek zein eragilek: “Ikusten da egoera honi aurre egiten saiatzeko proposamena dela”.
Goizean Guadalupeko Amabirjinari botoa berritu diote Guadalupeko santutegian. Bi meza egon dira, bata Alarde baztertzaileak antolatutakoa eta bestea Guadalupeko meza nagusia; udaleko eta Jaizkibeleko ordezkariek parte hartu dute azken horretan. Bertan, Txomin Sagarzazu alkateak goizean Berria-ri esan dionez, udal modura ez dute “Jaizkibelen proposamena landu” eta, orain, erraztaileekin lanean ari direla aurreratu du.
Elkarretaratzean, aldarri ugari
Urteetan zehar egin diren aldarrikapenak bildu dira eguerdiko elkarretaratzean. Hiru kartel nagusi ikusi ahal izan dira. Batean, Emakumeak alardean. Alardea, publikoa leloa zegoen ezarrita; ondokoan, konpainiako neska gaztek atera dutenean, Bidea ireki zenutenengatik gaude gu hemen. Ez dira beste 25 urte pasako irakur zitekeen; eta, hirugarrenean, Berdintasun legea gauzatu.
22. konpainia izatearen eskariari hainbat keinu egin dizkiote gerturatutakoek ere, eta horretarako, kartelak atera dituzte kalera. “Borroka feminista” oihukatu dute amaiera aldera, baita “Emakumeak alardean” ere. Duela urte batzuk konpainiak berak sortu zuen Egingo dugula, lortzear gaudela abestia kantatuz bukatu da omenaldia.
