Oiasso museoko jarduerek jarraituko dute abuztuan ere
Familientzako tailerrak, antzerkia eta bisita gidatuak izango dira erromatar museoaren abuztuko eskaintzaren osagai nagusiak.
Oiasso erromatar museoak ez du oporrik, eta abuztuan zehar ere hainbat jarduera eskaintzen jarraituko du. Ohiko jardueraz gain, eskaintza zabaldu egingo du, familientzako tailerrekin kasu. Tessellae mosaiko erromatarraren tailerra egingo du abuztuaren 3 eta 17an, Galeae erromatar kaskoen tailerra abuztuaren 11 eta 26an eta Arkeolab arkeologia tailerra, abuztuaren 5 eta 19an.
Tailer guztiak 11:00etan hasiko dira, eta 90 minutu iraungo dute. Aurretik izena eman beharko da, eta haur bakoitzeko lau euro ordaindu beharko dira. Gutxienez, seiko taldea beharko da aurrera atera ahal izateko.
Bestalde, Oiassoko emakumeak bakarrizketaren bigarren saio bat egingo dute, beste formatu batean. Hilaren 13an izango da, Ama Xantalen ermitan, Olatz Beobide eta Naiara Arnedorekin. Hilaren 20an, berriz, Patxi Perez eta Aia Kruse igoko dira oholtzara. Saio bikoitzak egingo dituzte bi egunetan: 12:30ean, eta 19:00etan. Horrez gain, Santa Elena ermita ezagutzeko aukera izango dute bisitariek saioaren aurretik, 60 minutu lehenago. Sarrerak Oiasso museoan egongo dira salgai 4 euroren truke.
Bisita gidatuak
Abuztuan zehar ere aurrera jarraituko dute bisita gidatuekin. Batetik, Ama Xantalen nekropolia eta hiria ezagutzeko; eta, bestetik, Irugurutzetako meatzeak ezagutzeko.
