"Ostalaritzan ematen diren gehiegikerien aurkako dinamika" abiatu du Bidasoko Langile Autodefentsa Sareak
Pandemiaren testuinguruan langileek jasandako "gehiegikeriak" salatzeko probestu nahi dute kanpaina, baita ere "antolakuntza komunista indartzeko".
Bidasoko Langile Autodefentsa Sareak “arlo laboralean ostalaritzan ematen diren gehiegikerien aurkako dinamika” abiatu berri du. Pandemiaren testuinguruan langileek jasandako “gehiegikeriak” salatzeko probestu nahi dute, baita ere “antolakuntza komunista indartzeko”.
Pandemiak ere eskualdean “eragin handia” izan duela esan dute lehenik sareko kideek, eta testuinguru horretan “klaseen arteko akordioa bilatzen duten adierazpen ugari” agertu direla, haien ustez ez baitio “jendartearen gehiengoaren interesei erantzuten, proletarizazioaren ondorioz haien kondizio soziala arriskuan ikusten dutenei salbu”. Finean, langile klasea “babesgabe eta erabakimen gaitasunik gabe” aurkitzen dela erantsi dute.
Zaurgarritasun egoera hau ostalaritzako langileen artean “agerikoa” dela diote, ohiko bilakatu dela kontraturik gabe lan egitea, ordu gehigarriak arruntak balira bezala kobratzea edo zuzenean ez kobratzea. Gainera, mehatxu sanitarioaren aitzakipean langile asko oporrak gastatzera behartuak izan direla diote, baita ere soldata murrizketak onartzera. Hortaz, “ostalaritzan ematen diren gehiegikeriak salatzeko eta klase ertainaren diskurtso iruzurtia borrokatzeko” abiatu dute aipatutako dinamika. “Honekin batera,langileok jasaten ditugun gehiegikeriei aurre egitera bidean, antolakuntza komunista indartzeko deia luzatzen dugu”, erantsi dute.
