Mendibil inguruko "arazoak" salatzeko elkarretaratzera deitu du auzo elkarteak
Erdialdeko Auzo Elkartearen arabera, inguru horretan hainbat arazo izan arren, udalak uko egin dio Mendibileko bizilagunekin zuen bilerara joateari.
Irungo udaletxea. Erdialdeko Auzo Elkarteak Mendibileko bizilagunen kexa ugari jasotzen ari dela jakinarazi du. Auzo elkartearen esanetan, eremu horretan hainbat arazo dituzte, hala nola, norabideen aldaketa, erdigunetik trafikoa arintzeko auzo horretara desbideratzea, irisgarritasuna eta oztopo arkitektonikoak, zerbitzuak, guneari egokitutako garraio publikoa, segutasuna, espaloiak eta ekipamendua…
Egoera horren aurrean, maiatzean udalari eremu horretan egingo dituzten ekintzen berri emateko eskatu zioten, eta ekainaren 14ean bilera batera deitu zituzten, udal teknikariekin batera. Auzo elkarteak azaldu duenez, bilera horretan, batetik, ekintza horien harira, bizilagunekin komunikazio arazo bat izan zuela onartu zuen udalak, eta, bestetik, norabideen aldaketen berri baino ez zieten eman.
Handik bi egunetara, Mendibilgo bizilagunak nahiz udala beste bilera batera deitu zituen auzo elkarteak, baina udalak batzar horretara joateari uko egin zion, beharrezkoa ez zela argudiatuta. Egoera horren aurrean, auzo elkarteak elkarretaratzea antolatu du ostegunerako, 11:15ean San Juan plazan, eta, segidan, prentsaren aurrean egingo dituzte adierazpenak.
Auzo elkartearen arabera, bilera horretan bizilagunek aurkeztutako kexa guztiak bildu zituzten. “Erdiguneko saihesbide berria izango diren bideek gurutzatuko dute gune hori guztia, eta, ondorioz, Mendibileko inguru guztia kaltetuko du”. Auzo elkarteak gogorarazi du “gune berezia” dela, ez bakarrik “kokatuta” dagoelako, baizik eta Kontserbatorioa, Adinekoen Egoitza eta haurreskola ere bertan daudelako.
