Antzerkiak, musikak eta zinemak Junkal plazatxoa hartuko dute
Astebururako kultur emanaldi ugari antolatu ditu udalak. Ohiko eskaintzaz gain, Kontenporanea topaketa egingo dute San Juan plazan.
Asteburua hau ere kultur ekitaldiz beteta dator. Datozen egunetarakoere emanaldi ugari antolatu ditu Kultura sailak. Ostegunetik larunbatera, antzerkiak, musikak eta zinemak Junkal plazatxoa hartuko dute beste aste batez.
Lehen hitzordua etzi (osteguna, hilak 22) izango da, iluntzean, 20:00etan. Trapuzaharra antzerki konpainiak Turistreando antzezlana taularatuko du, gaztelaniaz. Emanaldi honetan bidaia agentzia baten istorioa kontatuko dute, turismo industrialak edo masa turismoak ingurumenean dituen ondorioak minimizatzeko kanpaina bat abiatuko dute.
Ostiralean aldiz, musika izango da protagonista nagusia. Travellins brothers taldeak kontzertua eskainiko du, ryththm eta blus musikaz beteko dute plaza. 20:00etan ekingo diote musika emanaldiari.
Asteburua ixteko, abenturazko eta fantasiazko film bat eskainiko diete etxeko txikienei eta haien gurasoei. 22:00etatik aurrera, Aladdin obra klasikoaren bertsio berria (2019koa) proiektatuko dute.
Hiru saioak doakoak izango dira, baina gonbidapenak eskuratu beharko dira bertaratzeko, saioak hasi baino 50 minutu lehenago.
Proposamen gehiago
Junkal plazatxoa ez da izango asteburuko kultur agertoki bakarra. Izan ere, larunbatetik igandera bitarte Kontenporanea arte garaikidearen topaketa egingo dute San Juan plazan. Kultur sailaren arabera, aurtengo asmoa da “izandakoaren ikuspegiak partekatzeko gune bat sortzea, dikotomia hori ulertu eta lantzeko”. Gaia pandemiaren egoeraren ondorioz kanpoaren eta barrukoaren artean sortutako kontraste hori izango da. Zortzi proposamen artistiko egongo dira plazan. Bisita gidatu bat ere antolatu dute ostiralerako, 18:00etan.