Bi COVID-19 kasu agertu dira Inmaculada egoitzan
Bi adinekoak txertoa hartuta eduki arren, positibo eman dute, Gipuzkoako Foru Aldundiak jakinarazi duenez. Lurraldean egoitzetako beste hiru adinekok eman dute positibo.
Irungo Inmaculada egoitza. Azken orduetan Irungo Inmaculada egoitzan bi COVID-19 kasu izan direla jakinarazi du Gipuzkoako Foru Aldundiak. Ostiralekoak dira emandako azken datuak.
Aldundiaren arabera, denek zuten aurretik txertoa hartuta, eta Eibarko Ospitaleko COVID-19 erreferentzia zentrora eraman dituzte, “prebentzioagatik eta birusa egoitzaren barruan zabaltzea saihesteko”.
Irungoak ez dira Gipuzkoan izandako azken orduko positibo bakarrak izan, beste hiru kasu atzeman baitituzte Donostiako Aldakonea egoitzako erabiltzaileen artean. Horiek ere Eibarrera eraman dituzte.
Horrez gain, adineko bat ospitalean dagoela gaineratu du aldundiak, aurretiazko arnasteko gaixotasun baten ondorioz.
Irun eta Donostiakoak dira, egun, egoitzetako erabiltzaileen artean dauden kasu aktibo bakarrak, aldundiaren esanetan.
