EAJ, Irungo segurtasunaz: "Benetako arazo baten aurrean gaude"
Hirian dagoen segurtasun ezaz kezkatuta, horri aurre egiteko udal batzorde iraunkor bat sortzea proposatu dute jeltzaleek, hainbat eragilek osatutakoa.
Irungo EAJko kideak, artxiboko irudian. Irungo EAJk kezka agertu du Irunen dauden segurtasun arazoengatik. Urdanibia plazaren inguruan izandako azkenetan, nahiz aurretik izan direnetan jarri du arreta talde jeltzaleak: “Benetako arazo baten aurrean gaude”. Hori bideratzeko elkarlanerako deia egin dute, eta bide horretan, beharrezko ikusi dute segurtasunerako eta bizikidetzarako batzorde iraunkor bat sortzea. Udal gobernu taldeari luzatu dio eskaera: eztabaidarako foro gisa ulertzen dute batzordea, udaleko hainbat arlotako teknikariek, Udaltzaingoko eta Ertzaintzako ordezkariek, udal taldeetako kideek, eta hiriko eragileek osatua.
EAJren ustez, segurtasun ezari aurre egiteko bide poliziala ez da nahikoa. Udalean erantzunak modu bateratuan eta hainbat arlotan zeharka landu beharko liratekeela uste dute. Urtero ematen diren datuetatik harago, herritarren pertzepzioari jaramon egin behar zaiola adierazi du alderdiak. “Ez dugu beste norabait begiratu behar. Ez dugu uste arazo hori minimizatzen saiatzea positiboa edo eraginkorra denik”.
Adibide zehatzak eman dituzte jeltzaleek: “Etengabeko borrokak, Alde Zaharreko Auzo Elkartearen eta Santiago inguruko ostalarien salaketan, Pinar eta Irungo beste auzo batzuetako bizilagunek jasan dituzten arazoak… Nahikoa adierazle dira bizi dugun egoerari konponbide egokia eta adostua emateko”.
