[Galeria] Orotarikoak izan dira Hezkuntza Plazara dinamikak ezagutaraziko ondorioak
Diagnosiaren ondorioen berri emateko ekitaldia burutu dute mugimenduko kideek gaur arratsaldean San Juan plazan; hamarnaka lagunek parte hartu dute aurkezpenean.
Hezkuntza Plazara dinamikak diagnosiaren ondorioak aurkeztu ditu. 
Ekitaldia burutu du Hezkuntza Plazara dinamikak gaur arratsaldean San Juan plazan. Irungo hezkuntzak bizi duen egoerarekin kezka partekatu dute bertan bildutako hamarnaka lagunek. Abenduan lehen bilkura egin zutenetik orain arte landutako diangonisaren ondorioak ezagutaraztea izan da ekitaldiaren helburua.
Eneko Sanchezek eta Aitziber Ubegunek aurkeztu dute hitzordua. “Abenduaren 19an egin genuen moduan, hemen gaude berriz ere. Lehen aldiz Irungo hezkuntza komunitateak duen indarra eta beharra erakutsi genuen, eta ordutik, komunitatea saretzeko lanean jarraitu dugu”, adierazi du Sanchezek. Ubegunek, bere aldetik, “haurren egoera, familiena, langileena, ikasleena eta irakasleena kontuan hartuta” aurrera eraman dutela diagnostikoa erantsi du.
Joseba Ibarguren irakasleak hartu du hitza ondoren. “Gure egoera zehatzago ezagutzea eta gure behar eta aldarrikapenak modu argi batean zerrendatzea” izan dela azterlanaren xedea esan du irakasleak, baita ia mila lagunek parte hartu dutela azaldu ere.
Agerian geratutako ahuleziak eta beharrak
Ainara Lopez amak, Oihan Susperregi Pio Baroja institutuko ikasleak eta Naroa Metaberri jangelako langileak euren inpresioak azaldu dituzte banan-banan. Lehenaren arabera, ondorio nagusietako bat “ardura gehiegi jarri dela familiengan eta langileengan” izan da. Era berean, administrazioaren “planifikazio ezak” eta “ezjakintasunak” 2020-2021 ikasturte hasieratik “ezinegona” eta “bakardadea” eragin diela deitoratu du.
Horrez gain, hartutako neurriei “desegoki” iritzi die Lopezek, ez baitira ikastetxe bakoitzari egokitu, ezta ikasleen “osasun fisiko eta emozionalari” ere. Ildo horretan, “ikasleen eta familien eskubideak bermatzen duen kontziliazio eredua” aldarrikatu du gurasoak, “kontziliazio hori ahalbidetzen duten zerbitzuak egokituz”.
Oihan Susperregi Pio Baroja institutuko ikaslearen txanda iritsi da ondoren. Baliabideak, administrazioa eta irakasle zein ikastetxeei gaineko ondorioak azaldu ditu gazteak. “Baliabideei dagokienez, urtean zehar ez dugula bitarteko nahikorik izan ondorioztatzen dugu”, hasi da Susperregi. Administrazioaren kasuan, ikastetxeak ez direla “tokian tokiko errealitatera egokitu” eta gainera, “udalak hartutako neurriak eskasak eta aurreikuspenik gabekoak” izan direla adierazi du. Areago, “kasu askotan, guraso elkarteen presioari esker bideratu dira”.
Hala, azpiegituren “berrantolaketa” eta “espazio berriak sortzeko berebiziko premia” nabarmendu du, “udal instalazioak hezkuntzaren eskura jarriz, esaterako”. Azkenik, irakasle eta ikastetxeen esparruan, baliabide erabileraren inguruan hausnartu beharra dagoela uste du, baita iraksleen prestakuntza eguneratzeaz ere, “informazioaren eta komunikazioaren teknologiak (IKT) eta teknologia berriei dagokienez behinik behin”.
Naroa Mentaberri jangelako langileak azaldu ditu txostenean bildutako azken inpresioak. Ikasle guztien inklusioa “ezinbestekoa” jo du langileak, baita “eskolaren txertaketa auzoa eta naturarekin” ere. Mentaberrik, ratioen jaitsiera eta kontratazioen areagotze eta egonkortzea aldarrikatu ditu, familien eta ikastetxeen arteko komunikazioa areagotzea, eta euskararen erabilera sustatzea bezala.
Ubegunek eta Sanchezek diagnostikoaren entrega sinbolikoa egin diote udal agintarie txostena udaletxeko atarian utziz. Datorren ikasturtera begira, kezka adierazi dute, eta lanean jarraituko dutela erantsi: “Gure lana hasi besterik ez da egin”.
Ondokoa da ekitaldian bildutako argazki sorta.
