Hondarribiko Udalbatzak jorratuko dituen "zenbait gairen aurrean Abotsanitzen udal taldeak izango duen jarrera" aurreratu nahi izan du herri batzarrak.
Apirileko osoko-bilkura bihar egingo du Hondarribiko Udalbatzak. 
Bihar egingo du Hondarribiko Udalbatzak apirilari dagokion osoko-bilkura, eta bertan eztabaidatuko den “zenbait gairen aurrean Abotsanitzen udal taldeak izango duen jarrera” aurreratu nahi izan du alderdiak ohar baten bidez.
Lehenik eta behin, kale izendegiaren aldaketen inguruan, Emekik eta hainbat herritarrek egindako lanari “bikaina” iritzi dio Abotsanitzek. Azkenean, Mendelu auzoan kokatutako Planeta Sistemaren eskulturaren izen aldaketa -Amalur izendatzeko proposatu zuen Emekik- ez dela bozkatuko adierazi du. Honekin lotuta Hermandade pareko plaza Sare Konpontzaileak izendatzea mozio bidez eskatuko du. “Emekiren proposamena ere da, eta beste hiru proposamenekin egin bezala, hau ere plenora eramatea eskatu genuen batzordean, baina EAJk ez zuen nahi izan. Hori horrela, mozio bidez eramatea erabaki genuen”.
Mozioak
Udal taldeak zabaldu duenez, hiru mozio gehiago aurkeztuko dituzte herri batzarreko ordezkariek. Lehena, COVID-19arekin lotutako diru-laguntzak aktibatzeko eskaera izango da, baita “gaizki egindakoez ikastea eta ez errepikatzea ere”. Adierazitakoaren arabera, koronabirusarekin lotutako diru-laguntza “gutxien eman duen herrietako bat da Hondarribia”. Bigarren mozioak autokarabanen gaineko araudia eta ibilgailu horientzako leku bat egokitzeko eskatuko du, 2016an egin bezala, eta azkenak, etxebizitza politika “iraultzeko” galdegindo du.
Puntuz puntu
12 milioi euroko kreditu modifikazioa bozkatuko dute bihar udal taldeek. Denera, hamasei emendakin aurkeztu ditu Abotsanitzek eta horietatik zazpi barneratuko ditu bihar udalbatzak bozkatuko duen proposamenak, “lau udal gobernuaren proposamenak aintzat hartzen dituelako, eta beste hiru EAJrekin adostu ditugulako”. Aurrekontu parte hartzaileen diru-saila onartu ez izana deitoratu du udal taldeak, nahiz eta “datorren urteko aurrekontuan sartzeko konpromisoa hartu duen EAJk”.
Hala eta guztiz ere, exekuzioarekin kezka agertu du Abotsanitzek, “azken urteetako kreditu aldaketetan hartutako erabaki gehienak ez baitira burutu, kudeaketa txarra dela eta”.
Iazko aurrekontuaren gaineko likidazioaren berri emango du, bestalde, EAJren udal gobernuak. “Lotsatzeko modukoa iruditzen zaigu iaz, pandemiaren urtean, Hondarribiko Udalak 4,1 milioi euroko soberakina eduki izana”, adierazi dute. Txomin Sagarzazu alkate denetik 21 milioi euro hazi dela udal altxortegia azaldu dute kideek, eta “plangintza eza eta kudeaketa txarra dira horren arrazoi bakarra”.
Azkenik, “kudeaketa txarra” ere izan du hizpide Abotsanitzek udal langileek pairatutako bitartekotasun tasa ikaragarriaz mintzatzerakoan. Izan ere, plantilla organikoan eta lanpostuen zerrendan aldaketa bozkatuko dute bihar udal taldeek, baina benetako aldaketarik emango ez dela uste du: “Daukagun lanpostuen zerrenda joan den mendekoa da”.
